ކޭއާރުއެޗުގެ އެހީއާއެކު ނ އަތޮޅު ހޮސްޕިޓަލުގައި ފުރަތަމަ ފަހަރަށް ކަށީގެ ދެ އޮޕަރޭޝަނެއްކޮށްފި

ކުޅުދުއްފުށީ ރީޖަނަލް ހޮސްޕިޓަލްގެ އެހީތެރިކަމާއެކު ނ އަތޮޅު ހޮސްޕިޓަލުގައި ފުރަތަމަ ފަހަރަށް ކަށީގެ ދެ އޮޕަރޭޝަނެއްކޮށް ނިންމާލައިފި އެވެ.

މަނަދޫގައި ހުންނަ އަތޮޅު ހޮސްޕިޓަލުގައި މިމަހުގެ ކުރީކޮޅު ކުރި ކަށީގެ ދެ އޮޕަރޭޝަންއަކީ 57 އަހަރުގެ ފިރިހެނެއްގެ ކާޕަލް ޓަނަލް ރިލީޒްކުރަން ކުރި އޮޕަރޭޝަނަކާއި 52 އަހަރުގެ އަންހެނެއްގެ ވައަތު ފައިފައި އިން ގެންގްލިއަން ސިސްޓެއް ނެގުމަށ ކުރި އޮޕަރޭޝަނެކެވެ.

ނ އަތޮޅު ހޮސްޕިޓަލްގެ މެނޭޖަރު އިސްމާއިލް ޝަފީޤް ކޭއޯއަށް ވިދާޅުވީ، މިއީ ކޭއާރުއެޗާ ގުޅިގެން ހިންގުނު ފުރަތަމަ އައުޓްރީޗް ޕްރޮގުރާމުގެ ދަށުން ކުރި ދެ އޮޕަރޭޝަންކަމަށާއި މި ދެ އޮޕަރޭޝަންވެސް ވަރަށް ކާމިޔާބުކަމަށެވެ.

އޭނާ ވިދާޅުވީ، ތިން ދުވަހުގެ މުއްދަތަށް ކުރިއަށްގެންދިޔަ މި އައުޓްރީޗް ޕްރޮގުރާމުގައި ނަންނޯޓްކުރުމަށް ހުޅުވާލުމުން ނ އަތޮޅާއި ށ އަތޮޅުންވެސް ސަތޭކައަށްވުރެގިނަ މީހުން ނަންނޯޓްކުރި ކަމަށެވެ. ތިން ދުވަހުން ޑޮކްޓަރަށް ބެލޭނީ 45 މީހުން ކަމަށް ވިދާޅުވުމުން، ނަންނޯޓްކުރި މީހުންގެ ތެރެއިން ހިންގުނު ސްކްރީނިންގއަކަށްފަހު އެކަމަށް އެންމެ ބޮޑަށް ބޭނުންވާ 45 މީހަކަށް ފުރުސަތު ހޯދާދީފައިވާ ކަމަށެވެ.

އޭނާ ވިދާޅުވީ، ޑޮކްޓަރު މީހުން ބެއްލެވުމަށް، ނ އަތޮޅު ހޮސްޕިޓަލުގައި މިވަގުތު ހުރި ވަސީލަތްތަކުން ކުރެވޭނީ ތިން އޮޕަރޭޝަންކަމަށް ކަނޑައަޅައި އެތަނުން ދެ އޮޕަރޭޝަން ކާމިޔާބުކަމާއެކު ނިންމާލި ކަމަށެވެ. ތިންވަނަ އޮޕަރޭޝަން ނުކުރެވުނީ ބަލި މީހުންއަށް ހޮސްޕިޓަލަށް ނުދެވުނީމަކަށް އިސްމާއިލް ވިދާޅުވި އެވެ.

އިސްމާއިލް ވިދާޅުވީ، ހޮސްޕިޓަލުގައި ރަނގަޅު ވަސީލަތަކާއި ސްޕެޝަލިސްޓުންގެ ހިދުމަތް ލިބޭނެ ނަމަ މިއަށްވުރެ ފުރިހަމަ ގިނަ ހިދުމަތްތަކެއް ފޯރުކޮށްދެވޭނެ ކަމަށެވެ. އަދި މިހާރުވެސް ރިސޯޓަކުން އެ ހޮސްޕިޓަލަށް ހަދިޔާކޮށްހުރި ރަނގަޅު ފެންވަރުގެ ސްކޭނިންގ މެޝިނެއް ހުރިއިރު ރޭޑިއޮލޮޖިސްޓެއް ނެތް ކަމަށެވެ. އެހެންވުމުން މާބަނޑު މީހުން ސްކޭންކުރުމަށް ފޮނުވަން ޖެހެނީ އެހެން ހޮސްޕިޓަލްތަކަން އޭނާ ފާހަގަކުރި އެވެ.

During the first outreach program to Noonu Atoll by KRH, our Orthopedician Dr. Goda performed the first orthopedic surgery in NAH. During our visit our management and NAH management discussed about the challenges and the positive synergy that we can bring in future. https://t.co/aJlisU3zFP

— Kulhudhuffushi Regional Hospital (@KRHmv) September 9, 2020

އަދ ވަރަށް ކުދިކުދި ސްކޭނިންގތަކުގައިވެސް މީހުން އެހެން ހޮސްޕިޓަލްތަކަށް ފޮނުވަންޖެހޭކަން އޭނާ ފާހަގަކުރެއްވި އެވެ. އެ ހޮސްޕިޓަލަށް ހަދިޔާކޮށްފައިހުރި ސްކޭނިންގ މެޝިންގެ ހިދުމަތް ފޯރުކޮށްދިނުމަށް ރޭޑިއޮލޮޖިސްޓެއް ހަމަޖައްސައިދިނުމަކީ އެ ހޮސްޕިޓަލްގެ ވަރަށް ބޮޑު އެދުމެކެވެ.

އިސްމާއިލް ވިދާޅުވީ، ކުރިއަށްއޮތްތަނުގައިވެސް އެ ހޮސްޕިޓަލުން ލިބެން ނެތް ހިދުމަތްތައް އަތޮޅަށް ފޯރުކޮށްދިނުމަށް ކޭއާރުއެޗާ ގުޅިގެން ކުރިއަށްގެންދަން މަޝްވަރާކުރެވިފައިވާކަމަށެވެ. މި އައުޓްރީޗް ޕްރޮގުރާމު ކުރިއަށްދިޔުމަށް ކޭއާރުއެޗުގެ މެނޭޖަރު އަހުމަދު ދާއޫދު އަދި މެނޭޖްމެންޓާއި މުވައްޒަފުންގެ ފަރާތުން ވަރަށް ބޮޑު އެއްބާރުލުމެއް ލިބިގެންދިޔަކަން އޭނާ ފާހަގަކުރެއްވި އެވެ. އަދި މީގެ އިތުރުން މަދު ވަސީލަތްތަކާއެކުވެސް މިފަދަ ކަންތައްތައް ވީވަރަކުން ކުރިއަށްގެންދިޔުމަށް ނ އަތޮޅު ހޮސްޕިޓަލްގެ ހުރިހާ މުވައްޒަފުންގެ ފަރާތުން ލިބޭ އެއްބާރުލުމާއި އެހީތެރިކަން ފާހަގަކޮށް ޝުކުރުއަދާކުރެއްވި އެވެ.