ހޯރަފުށީ އެއާޕޯޓުގެ ޕެސެންޖާ ޓާމިނަލް ހެދުމުގެ މަސައްކަތް ފަށައިފި

ހއ. ހޯރަފުށި އެއާޕޯޓުގެ ޕެސެންޖާ ޓާމިނަލް އަދި ފަޔާ ބިލްޑިންގް އިމާރާތްކުރުމުގެ މަޝްރޫއުގެ އަމަލީ މަސައްކަތް ފަށާފައިވާކަމަށް މި މާޝްރޫއު ހަވާލުކޮށްފައިވާ އެމްޓީސީސީން ބުނެފިއެވެ.

އެމްޓީސީސީން ބުނީ ހޯރަފުށި އެއާޕޯޓުގެ ޕެސެންޖާ ޓާމިނަލް އަދި ފަޔާ ބިލްޑިންގް އިމާރާތްކުރުމުގެ އަމަލީ މަސައްކަތް ފެށީ މި މަހުގެ 21 ވަނަ ދުވަހު ކަމަށެވެ. މި މަސައްކަތް އެމްޓީސީސީއާ ހަވާލުކޮށްފައިވަނީ މިދިޔަ އޮގަސްޓް މަހުފެ 27 ގައެވެ.

ޓްރާންސްޕޯޓު މިނިސްޓްރީން ބުނީ މިއީ 16،131،042.02 ރުފިޔާގެ މަޝްރޫއެއް ކަމަށެވެ. އަދި އެއީ 100 މީހުންގެ ޖާގައިގެ ޓާމިނަލް އެއް ކަމަށެވެ. އެއާޕޯޓުގެ ފެސެންޖާ ޓާމިނަލް އަދި ފަޔާ ބިލްޑިންގް އިމާރާތްކުރަން އެމްޓީސީސީއާ ހަވާލުކޮށްފައި ވަނީ 80 ދުވަހުގެ ތެރޭގައި މަސައްކަތް ނިންމާ ގޮތަށެވެ.

ހޯރަފުށީ އެއާޕޯޓު ތަރައްގީ ކުރަނީ 1.2 ކިލޯމީޓަރުގެ ރަންވޭއަކާއި 86،35 ސްކޮޔާ މީޓަރުގެ އޭޕްރަން އަކާއި ޓެކްސީ ވޭއެއްގެ އިތުރުން ސާވިސް މަގުތަކާއި، 9،473 ސްކޮޔާ މީޓަރުގެ ޕާކިން އޭރިއާއަކާއި 1،718 ސްކޮޔާ މީޓަރުގެ ފަޔާ އެކްސެސް މަގަކާ އެކު އެވެ.