ކޮވިޑާއި ގުޅިގެން އަތޮޅުތެރެއަށް ދިރިއުޅުން ބަދަލުކުރާ މީހުންނަށް އެހީ ދެނީ

ކޮވިޑް19ގެ ސަބަބުން ދިރިއުޅު އެހެން ރަށަކަށް ދިރިއުޅުން ބަދަލުކުރަން މަޖުބޫރުވާ ފަރާތަކަށް ދިރިއުޅުން އާރާސްތުކުރަން ފައިސާގެ އެހީ ފޯރުކޮށްދޭން 2021 ވަނަ އަހަރުގެ ބަޖެޓުގަިއ ހިމަނައިފިއެވެ.

އަންނަ އަހަރަށް ލަފާކުރި ބަޖެޓު މިއަދު މަޖިލީހަށް ހުށައަޅާފައިވާއިރު ބަޖެޓުގައި ކޮވިޑް19 އާއެކު އިޖުތިމާއީ އެތައް ކަމެއް ބަދަލުވެ، ވަޒީފާ ނެތް މީހުންގެ އަދަދު ގިނަވުމުގެ އިތުރުން، ގިނަރައްޔިތުންގެ ދިރިއުޅުމުގެ ހާލަތަށް ބޮޑު ބަދަލެއް އައިސްފައިވާކަން ވަނީ ފާހަގަކޮށްފައެވެ.

އެގޮތުން ރައްޔިތުންގެ ދިރިއުޅުމުގެ ފެންވަރު ރަނގަޅުކުރުމަށާއި އިޖުތިމާއީ ރައްކާތެރިކަން ފޯރުކޮށްދިނުމަށް ޕްރޮގްރާމްތައް ހިންގުމަށް ބަޖެޓުގައި ރާވާފައިވެއެވެ.

އޭގެ ތެރޭގައި ދިރިއުޅުމުގެ ހާލަތު ބަދަލުވެގެން ރަށްރަށަށް ހިޖުރަކޮށް ދިރިއުޅުން އަލުން އާރާސްތުކުރުމަށް ބޭނުންވާ އެހީތެރިކަން ފޯރުކޮށްދިނުން ހިމެނެއެވެ.

އަދި ކޮވިޑް19 ގެ ސަބަބުން ދިރިއުޅުމުގެ ހާލަތު ބަދަލުވެ، އިޖުތިމާއީ ރައްކާތެރިކަމުގެ ނިޒާމުގެ ތެރެއިން އެހީތެރިކަން ކޮންމެހެން ފޯރުކޮށްދޭންޖެހޭ ފަރާތްތަކަށް އެހީތެރިކަން ފޯރުކޮށްދިނުމަށާއި ދިރިއުޅުން އަލުން އާރާސްތުކުރަން މަގުފަހިކޮށްދިނުމުގެ ސިޔާސަތުތައް ތަންފީޒުކުރުމަށް ބަޖެޓުގައި ހާއްސަ ސަމާލުކަމެއް ދީފައިވެއެވެ.

ދިރިއުޅުން އެހެން ރަށަކަށް ބަދަލުކޮށް އަލުން އާރާސްތުކުރުމަށް ދިމާވެފައިވާ ހުރަސްތައް ދުރުކޮށް އެހީތެރިވެދިނުމަށްޓަކައި 25 މިލިއަން ރުފިޔާ ބަޖެޓުގައި ވަނީ ކަނޑައަޅައިފައެވެ.

އެ ޕްރޮގްރާމް އަމާޒުކޮށްފައިވަނީ މާލޭ ސަރަހައްދުގައި ދިރިއުޅޭ އާއިލާތަކުގެ ތެރެއިން 18 އަހަރުން ދަށުގެ ކުދިން ތިބި، ދިރިއުޅުން އެހެން ރަށަކަށް ބަދަލުވާން ބޭނުންވެފައިވާ ފަރާތްތަކަށެވެ.

އަންނަ އަހަރަށް ހުށަހަޅާ ބަޖެޓަކީ 34،787.7 މިލިއަން ރުފިޔާއެވެ. ބަޖެޓު ހުށަހަޅަން ޖެހިފައި ވަނީ ރާއްޖެއަށް މިހާތަނަށް ދިމާވެފައިނުވާ ފަދަ އިގުތިސާދީ ތަދުމަޑުކަމެއްގެ ތެރޭގައިކަން ފިނޭންސް މިނިސްޓަރު އިބްރާހިމް އަމީރު ވަނީ ފާހަގަކުރައްވައިފައެވެ.