މޯލްޑިވްސް ލޭންޑް އެންޑް ސަރވޭ އޮތޯރިޓީގެ ނަމުގައި އާ އޮތޯރިޓީއެއް އުފައްދަން ސަރުކާރުން ނިންމައިފި

މޯލްޑިވްސް ލޭންޑް އެންޑް ސަރވޭ އޮތޯރިޓީގެ ނަމުގައި އާ އޮތޯރިޓީއެއް އުފެއްދެވުމަށް ވަޒީރުންގެ މަޖިލީހުން މިއަދު ނިންމަވައިފިއެވެ.

މިއަދު އޮތް ވަޒީރުންގެ މަޖިލީހުގެ ޖަލްސާގައި ލޭންޑް އެންޑް ސާރވޭ އޮތޯރިޓީއެއް އުފެއްދެވުމަށް ނިންމެވީ، އެ އޮތޯރިޓީ އުފެއްދެވުމާ ގުޅޭގޮތުން މިނިސްޓްރީ އޮފް ހައުސިންގ އެންޑް އެންވަޔަރަންމަންޓުން ހުށަހެޅުއްވި ކަރުދާހެއްގެ މައްޗަށް ވަޒީރުންގެ މަޖިލީހުގެ މެންބަރުން މަޝްވަރާ ކުރެއްވުމަށްފަހުގައެވެ.

މޯލްޑިވްސް ލޭންޑް އެންޑް ސަރވޭ އޮތޯރިޓީގެ ނަމުގައި އާ އޮތޯރިޓީއެއް އުފެއްދެވުމަށް މިނިންމެވީ، ރާއްޖޭގެ ބިމާއި، ފަރާއި، ފަޅު އެންމެ ހެޔޮ ގޮތުގައި ބޭނުންކުރުމަށް ބޭނުންވާ މަޢްލޫމާތު އެއްކޮށް، ދިރާސާކޮށް ބެލެހެއްޓުމުގެ މަސައްކަތްތަކާއި، ކެޑެސްޓްރަލް ސަރވޭގެ މިންގަނޑުތައް އެކުލަވާލައި ތަންފީޛު ކުރާނެ ވަކި މުއައްސަސާއެއް ނެތުމުން އެކަންކަން ރަނގަޅު އިންތިޒާމެއްގެ ދަށުން ގެންދިޔުމަށް ކަމަށް ރައީސް އޮފީހުން ހާމަކުރެއެވެ.

މޯލްޑިވްސް ލޭންޑް އެންޑް ސާރވޭ އޮތޯރިޓީ އުފެއްދެވުމުން އެކިދާއިރާތަކުން މިހާރު ކުރަމުން ގެންދާ އެއޮތޯރިޓީގެ މައިގަނޑު މަސައްކަތާ ގުޅުންހުރި މަސައްކަތްތައް، އެއްއޮފީހަކުން ކުރަމުން ގެންދިޔުމުގެ މުހިންމުކަންވެސް މެންބަރުން ފާހަގަކުރެއްވި ކަމަށް ރައީސް އޮފީހުން މައުލޫމާތު ދެއެވެ.