ބޮޑު ބަދަލަކާއެކު އިތުރު ދެ ސައިޒެއްގެ ތާޒާ ބްރޭންޑްގެ ފެން ފުޅި ބާޒާރަށް ނެރެފި

އައިލެންޑް ބެވަރޭޖްސް މޯލްޑިވްސް (އައިބީއެމް) އިން ރާއްޖޭގައި ތައްޔާރުކޮށް ވިއްކަމުން އަންނަ “ތާޒާ” ބްރޭންޑްގެ ފެނަށް ބޮޑެތި ބަދަލުތަކެއް ގެނެސް އިތުރު ދެ ސައިޒެއްގެ ފެންފުޅި ބާޒާރަށް ނެރެފިއެވެ.

އެމްޑަބްލިޔުއެސްސީ އާއި ޗަމްޕާ ބްރަދާސް ގުޅިގެން އުފައްދާފައިވާ އައިބީއެމް އިން އަލަށް ބާޒާރަށް ނެރެފައިވާ ދެ ސައިޒަކީ 330 އެމްއެލް އާއި އެއް ލީޓަރު ފެން ފުޅިއެވެ. މީގެ އިތުރުން ކުރިން ވިއްކަމުން އައި ފުޅިތަކުގެ ޑިޒައިން ބަދަލުކޮށްފައިވާއިރު ނޫކުލައިގެ ބަދަލުގައި ފެންފުޅިތަކުގައި މިހާރު ބޭނުންކޮށްފައިވަނީ ފެހިި ކުލައެވެ.

ތާޒާ ފެނަށް އައި ބަދަލުތައް ތައާރަފް ކުރުމަށް އާދިއްތަ ދުވަހުގެ ރޭ ދަރުބާރުގޭގައި ވަނީ ހާއްސަ ރަސްމިޔާތެއް ބާއްވާފައެވެ. އެރަސްމިޔާތުގައި ތާޒާގެ ބަދަލުތައް ތައާރަފް ކޮށްދެއްވީ ހައުސިން މިނިސްޓަރ މުހައްމަދު އަސްލަމެވެ.