އަންނަ މަހު ތިނަކަށް ކުއްލި ނުރައްކަލުގެ ހާލަތު އިތުރުކޮށްފި

ކޮވިޑާ ގުޅިގެން އިއުލާނުކޮށްފައިވާ ސިއްހީ ކުއްލި ނުރައްކަލުގެ ހާލަތު އެއް މަސް ދުވަހަށް އަނެއްކާވެސް އިިތުރުކޮށްފި އެވެ.

މިދިޔަ އަހަރު މާޗު މަހުގެ 12 ވަނަ ދުވަހުން ފެށިގެން އިއުލާނުކޮށްފައިވާ އާންމު ސިއްހަތުގެ ކުއްލި ނުރައްކަލުގެ ހާލަތުގެ މުއްދަތު ފެބުރުއަރީ މަހުގެ ތިން ވަނަ ދުވަހާ ހަމައަށް ދެމެހެއްޓުމަށް ނިންމާފައިވާ ކަމަށް އެޗްޕީއޭއިން މިއަދު ވަނީ ބުނެފައެވެ.

މިހާރު އިއުލާނުކޮށްފައި އޮތް ސިއްހީ ކުއްލި ނުރައްކާ ހަމަވަނީ މިރެއަށެވެ. ހެލްތު މިނިސްޓަރު އަހުމަދު ނަސީމް ސޮއިކުރައްވާ އެ މިނިސްޓްރީން މިއަދު ނެރުނު ނޫސްބަޔާނުގައި ބުނީ، ރާއްޖޭގައި ފުޅާ ދާއިރާއެއްގައި ބަލި ފެތުރުމުގެ ފުރުސަތު އަދިވެސް އޮތް ކަމަށާއި މާޗު މަހުގެ 12 ވަނަ ދުވަހު އިއުލާނުކުރި ސިއްހީ ކުއްލި ނުރައްކަލުގެ ހާލަތު އަދިވެސް ދެމިއޮތް ކަމަށެވެ.

ރާއްޖޭގައި މިހާތަނަށް 13،867 މީހުން ކޮވިޑަށް ޕޮޒިޓިވްވެފައިވާއިރު 13،191 މީހުން ވަނީ ބަލިން ރަނގަޅުވެފައެވެެ. ބަލީގައި 48 މީހަކު ރާއްޖެއިން ވަނީ މަރުވެފައެވެ. އެއީ 40 ދިވެހީންނާއި އަށް ބިދޭސީންނެވެ.