ތަފާތު ބާވަތްތަކުގެ މަހާއި ދޫނި ވިއްކާ ޕެޓްޝޮޕެއް ކުޅުދުއްފުށީގައި ހުޅުވައިފި

މުހައްމަދު އާދަމް

ކުޅުދުއްފުށީގައި މުޅިން އަލަށް އެކިއެކި ބާވަތްތަކުގެ މަހާއި ދޫނި ވިއްކާ ޕެޓްޝޮޕެއް ހުޅުވައިފިއެވެ.

13 މެއި 2011 ވީ ހުކުރުދުވަހު “ޒޭވަރު” ކިޔާގޭގައި “މައި ޕެޓް” ނަމުގައި މިހުޅުވި ޕެޓްޝޮޕުން ތަފާތު ވައްތަރުތަކުގެ ކޯރުމަހާއި ދޫނީގެ އިތުރުން މަސްކާނާއާއި ދޫނިކާނާ ލިބެންހުންނާނެކަމަށް އެފަރާތުން މަޢުލޫމާތު ދެއްވައެވެ.

ފެމިލީ ބިޒްނަސްއެއްގެ ގޮތުގައިފެށި މި ވިޔަފާރިއަކީ މާލޭގައި މިފަދަ ވިޔަފާރިކޮށް އުޅޭފަރާތަކާއި ގުޅިގެން ހިންގަން ފަށާފައިވާ ވިޔަފާރިއެއްކަމަށާއި މިފަދަ ޕެޓްޝޮޕެއް ހުޅުވުމުގެ މަޤުޞަދަކީ ރަށުގައި އާއްމު ނޫން ވިޔަފާރިއެއް ތައާރަފްކޮށް މިޒަމާނުގެ ޒުވާނުންގެމެދުގައި ޕެޓް ގެންގުޅުމަށް އޮންނަ ލޯތްބެއްގެ ސަބަބުން ރަށުގައި ތިބެގެން އެފަދަ އެއްޗެހި ލިބޭ ނޭގޮތް މެދުވެރި ކޮށްދިނުންކަމަށް ޕެޓް ޝޮޕްގެ އެއްހިއްސާދާރު ދާއޫދު މުޙައްމަދު ވިދާޅުވިއެވެ. އަދި މިތަނުން މާލެއާއި ދާދި އެއްއަގެއްގައި މަހާއި ދޫނި ލިބެން ހުންނާނެކަމަށްވެސް އެފަރާތުން މަޢުލޫމާތު ދެއްވިއެވެ.

މިހާރު މާލޭގެ ބަޔަކާއި ގުޅިގެން މިވިޔަފާރި ކުރިއަށްގެންދާ ކަމުގައިވިޔަސް ކުރިއަށް އޮތްތަނުގައި ރާއްޖެއިން ބޭރުން ތަފާތު ވައްތަރުގެ މަހާއި ދޫނި އެތެރެކުރުމަކީ އެފަރާތުން ކުރާ އުއްމީދެއްކަމަށާއި ނަމަވެސް ދިމާވާ އެންމެބޮޑު ދައްޗަކީ ޖަނަވާރު އެތެރެކުރުމުގައި ނަގަންޖެހޭ ޚާއްސަ ހުއްދަތައްކަމަށްވެސް އެފަރާތުން މަޢުލޫމާތު ދެއްވިއެވެ.

“މައި ޕެޓް” ފިހާރަ ހުންނަނީ ފޮޓޯމެޖިކްގެ އުތުރުން ޒޭވަރު ކިޔާ ގޭގައެވެ.