އެސްޑީއެފްސީން ދޫކުރާ ލޯނުތަކަށް އެދުމުގެ ފުރުސަތު އަލުން ހުޅުވާލައިފި

އެސްއެމްއީ ޑިވެލޮޕްމަންޓް ކޯޕަރޭޝަން، އެސްޑީއެފްސީން ދޫކުރާ ލޯނުތަކަށް އެދުމުގެ ފުރުސަތު އަލުން ހުޅުވާލުމާއެކު ގިނަ ބަޔަކު ލޯނަށް އެދެމުންދާކަމަށް އެ ބޭންކުން ބުނެފިއެވެ.

ކޯވިޑް19 އާއި ގުޅިގެން އެސްއެސްއީ ބޭންކުން ދޫކުރާ ލޯނުތަކަށް އެދުމުގެ ފުރުސަތު މިދިޔަ އަހަރުގެ ބޮޑުބައިގައި އެ ބޭންކުން ވަނީ މެދުކަނޑާލާފައެވެ. އެސްއެމްއީ ބޭންކުން ދޫކުރަމުން އައި ލޯނުތައް ދޫކުރުން މެދުކަނޑާލާފައި އޮތުމަށްފަހު މި ލޯނުތަކަށް އެދުމުގެ ފުރުސަތު ހުޅުވާލީ މިދިޔަ ސެޕްޓެމްބަރ މަހުގެ ތެރޭގައެވެ.

އެއަށްފަހު އަހަރީ ހިސާބުތައް ނިންމުމަށްޓަކައި ޑިސެމްބަރމަހު ލޯނަށް އެދުން މެދުކަނޑާލުމަށްފަހު އަލުން ލޯނަށް ހުޅުވާލާފައިވަނީ މިއަހަރުގެ ފެބްރުއަރީ މަހުގެ ތެރޭގައެވެ.

އެސްއެމްއީ ބޭންކުން ބުނީ މިއަހަރުގެ ތެރޭގައި އަނެއްކާވެސް ލޯނަށް އެދޭ ފަރާތްތަކުގެ އަދަދު އިތުރުވެފައިވާކަމަށާއި އެސްޑީއެފްސީގެ ލޯނު ޕޯޓްފޯލިއޯގެ ދަށުން ހިމެނޭ ލޯނުތަކަށް މިދިޔަ އަހަރު އެދިފައިވަނީ 343 ފަރާތަކުން ކަމަށެވެ.

މިދިޔަ އަހަރު ގިނައިން ދޫކޮށްފައިވަނީ ސަރުކާރުގެ އިގްތިސާދީ ރިކަވަރީ ޕެކޭޖްގެ ދަށުން މިނިސްޓްރީ އޮފް ފިނޭންސް އާއި ގުޅިގެން ކޮވިޑް-19 ވިޔަފާރި އެހީގެ ނަމުގައި ތައާރަފް ކޮށްފައިވާ ލޯނުކަމަށް އެސްއެމްއީ ބޭންކުން ބުނެއެވެ.

މިއަހަރުގެ މިހާތަނަށް 119 ފަރާތަކުން ލޯނަށް އެދި ހުށައަޅާފައިވާކަމަށާއި މީގެތެރޭގައި ގިނަ ފަރާތްތަކުން ލޯނަށް އެދެނީ ފަތުރުވެރިކަމާއި މަސްވެރިކަމުގެ ދާއިރާއަށްކަން އެ ބޭންކުން ފާހަގަކުރެއެވެ.