ބީއެމްއެލްގެ އީއައިބީ ކޮވިޑް ރިލީފް ލޯނު ބަލައިގަތުން ހުއްޓާލައިފި

ޔޫރަޕިއަން އިންވެސްޓްމަންޓް ބޭންކް (އީއައިބީ)ގެ ފަންޑުގެ އެހީގައި ކޮވިޑްް ރިލީފް ސަޕޯޓްގެ ދަށުން ކުދި އަދި މެދުފަންތީގެ ވިޔަފާރިތަކަށް އަމާޒުކޮށް ބޭންކް އޮފް މޯލްޑިވްސް އިން ތައާރަފްކުރި އީއައިބީ ކޮވިޑް ރިލީފް ލޯނަށް އެދޭ ފޯމު ބަލައިގަތުން ހުއްޓާލައިފި އެވެ.

ބީއެމްއެލް އިން މިއަދު ބުނީ އެ ލޯނަށް އެދި ހުށަހަޅާ ފޯމު ބަލައިގަތުން މިއަދު ހުއްޓާލީ ލޯނުގެ ފަންޑަށް ކަނޑައެޅި އަދަދު ހަމަވުމާ ގުޅިގެންނެވެ.

އީއައިބީ ކޮވިޑް ރިލީފް ލޯނު ދޫކުރީ ހަ ޕަސެންޓުގެ އިންޓަރެސްޓް ރޭޓުގަ އެވެ. ލޯނު އަނބުރާ ދެއްކުމަށް ހަތަރު އަހަރާއި ހަތް އަހަރާ ދެމެދުގެ މުއްދަތެއް ލިބިގެންދާނެ އެވެ.

ލޯނަށް ހުޅުވާލި ފުރުސަތުގެ ދަށުން 15.42 މިލިއަން ރުފިޔާ އާ ހަމަޔަށް ލޯނަށް އެދުމުގެ ފުރުސަތު ހުޅުވާލި އެވެ.

ކޮވިޑް19އާ ގުޅިގެން ރާއްޖޭގެ އިގްތިސާދަށް ކޮށްފައިވާ ނޭދެވޭ އަސަރާ ގުޅިގެން އީއައިބީ އިން ފިނޭންސް މިނިސްޓްރީއާއި ބީއެމްއެލްއާ އެކު އެގްރިމެންޓުގައި ސޮއިކުރީ 20 މިލިއަން ޔޫރޯގެ ލޯން އެގްރީމަންޓެއްގަ އެވެ.