ކޭލަކުނު ހދ އަތޮޅު ކައުންސިލާ ހަވާލުކުރިކަމަށް އެންގި އެންގުން ފިޝަރީޒް މިނިސްޓްރީ އިން ބާތިލުކޮށްފި

އިބްރާހިމް ހަމީދު

ހދ. އަތޮޅުގެ ފަޅުރަށެއްކަމުގައިވާ ކޭލަކުނު ވަގުތީ ގޮތުން ބެލެހެއްޓުން ހދ އަތޮޅު ކައުންސިލާ ހަވާލުކުރުމަށްފަހު ފިޝަރީޒް މިނިސްޓްރީން އެކަން އެންގި އެންގުން ބާތިލުކޮށްފިއެވެ.

ކުޅުދުއްފުށީ އޮންލައިނަށް މަޢުލޫމަތު ދެއްވަމުން ހދ. އަތޮޅު ކައުންސިލްގެ މެމްބަރު ޒަކަރިއްޔާ ހަސަން ވިދާޅުވި އެޕްރީލް މަހުގެ 4 ވަނަދުވަހު އެގްރިކަލްޗަރ މިނިސްޓްރީން ހދ.އަތޮޅުގެ ފަޅު ރަށެއް ކަމުގައިވާ ކޭލަކުނު ވަގުތީ ގޮތުން ބެލެހުއްޓުން އަތޮޅު ކައުންސިލް އިދާރާއާއި ހަވާލު ކުރިކަމަށެވެ. އަދި އެވަގުތުން ފެށިގެން ހދ އަތޮޅު ކައުންސިލުގެ ޓީމެއް އެރަށަށް ގޮސް އެރަށުގައި މިވަގުތު ކުރެވެން ހުރީ ކޮންކަމެއްތޯ ބަލާ ހެދުނުކަމަށެވެ.

އަތޮޅު ކައުންސިލުން ކޭލަކުނަށް ދިޔައިރު އެރަށް ސަރުކާރުން ހަވާލުކޮށްފައިވާ ދަގެތީ ހަސަންގެ ދެމުވައްޒަފުން އެރަށުގައި މަސައްކަތުގައި ހަރަކާތްތެރިވަމުން ދިޔަކަމަށް އަތޮޅު ކައުންސިލުން ބުނެއެވެ. އަދި އެރަށް ކުރިން ހަވާލުކޮށްފައިވާ ފަރާތަށް ގުޅާ ކައުންސިލްގެ ޓީމެއް އެރަށުގައި އެވަގުތު ހަރަކާތްތެރިވަމުންދާ ކަމަށާއި ކޭލަކުނަކީ ކައުންސިލް އިދާރާގެ ބެލުމުދަށުގައި ވާރަށެއްކަމުން އެރަށުގައި މިހާރު ހުރި ތަކެއްޗަކީ ކައުންސިލް އިދާރާގެ ބެލުމުގައިވާ ތަކެތި ކަމަށް އެރަށް ބަލަހައްޓަމުންދިޔަ ހަސަނަށް އެންނި ކަމަށް ހދ އަތޮޅު ކައުންސިލުން މައުލޫމާތު ދެއެވެ. އަދި ކައުންސިލަށް ނޭގި އެރަށުން އެއްވެސް އެއްޗެއް ބޭރުނުކުރެވޭނެކަމަށް އެނގިކަމަށްވެސް އެއިދާރާއިން މައުލޫމާތު ދެއެވެ. އެހެންމަވެސް ހަސަން އެކަމާ ދެކޮޅު ހެދިކަމަށްވެއެވެ.

ހދ އަތޮޅު ކައުންސިލުން ބުނީ ހަސަނަށް ކައުންސިލުން އެންގީ އެވަގުތު ހަސަންގެ ދެމުވައްޒަފުން އެރަށުގައި ހަރަކާތް ތެރިވަމުންދާތީ ކަމަށާއި އުޞޫލެއްގެ ގޮތުން ކައުންސިލުގެ ބެލުމުގެ ދަށުގައިވާ ރަށަކަށް ދާއިރު އެރަށުގައި މަސައްކަތްކުރަމުންދިޔަ ފަރާތަށް އަންގަން ނުޖެހޭނެކަމަށް ކައުންސިލް މެމްބަރު ޒަކަރިއްޔާ ހަސަން ވިދާޅުވިއެވެ.

ހދ އަތޮޅު ކައުންސިލާ ކޭލަކުނު ހަވާލުކުރުމަށްފަހު އޭގެ ދެތިންދުވަސް ފަހުން ސަރުކާރުން ކައުންސިލް އިދާރާއަށް އަންގާފައިވަނީ ކޭލަކުނު ވަގުތީގޮތުން ބަލަހައްޓަން ހަވާލު ކުރި ކުރުން ބާތިލް ކުރިކަމަށާއި އެރަށުގެ މައްސަލައެއް މިހާރު އެރަށް ހިންގަ ފަރާތުން ކޯޓަށް ހުށައަޅާފައިވާ ކަމަށެވެ.

އެރަށުގައި މައިގަނޑުގޮތެއްގައި ހުރީ ކާށި ކަމަށާއި މިވަގުތު ކޭލަކުނަކީ ހދ އަތޮޅު ކައުންސިލް ގެ ބެލުމުގެ ދަށުގައިވާ ރަށެއްނޫން ކަމަށް ޒަކަރިއްޔާ ހަސަން މަޢުލޫމާތު ދެއެވެ.