ކޮންމެ ބަޔަކު ކައުންސިލްގައި ތިއްބަސް، އެއްބާރުލުމާއި ބާރުވެރިކަން ދޭނެކަމަށް ރައީސް ވިދާޅުވެއްޖެ

ކައުންސިލްތަކަށް ހިދުމަތް ދިނުމުގައި އެ ކައުންސިލްގައި ތިއްބެވީ ކޮން ޕާޓީއަކަށް ނިސްބަތްވެވަޑައިގަންނަވާ ކައުންސިލަރުން ތޯ ސަރުކާރުން ނުބަލާނެކަމަށް ރައީސުލް ޖުމްހޫރިއްޔާ އިބުރާހިމް މުހައްމަދު ސޯލިހް ވިދާޅުވެއްޖެ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ސޯލިހް ވިދާޅުވީ، ލާމަރުކަޒީ ނިޒާމަކީ އެމްޑީޕީގެ ތަސައްވަރެއް ކަމަށާއި އޭގެ ދަށުން ކައުންސިލްތަކަށް ދޭން ޖެހޭ އެއްބާރުލުމާއި ބާރުވެރިކަން މި ސަރުކާރުން ދޭނެ ކަމަށެވެ.

"އެ އަދި ކޮންމެ ޕާޓީއަކަށް ނިސްބަތްވާ މެމްބަރުން ކައުންސިލްގައި ތިއްބެވިޔަސް އަދި ކޮންމެ ޕާޓީއަކަށް އަގުލަބިއްޔަތު އޮތްކަމުގައި ވިޔަސް އެއަށް އަޅުގަނޑުމެން ނުބަލާނަން." ރައީސުލް ޖުމްހޫރިއްޔާ ވިދާޅުވި އެވެ.

ރައީސް މިމޭރުމުން ވާހަކަދައްކަވާފައިމިވަނީ ނިމިދިޔަ ކައުންސިލް އިންތިހާބުގައި މީގެ ކުރިން އެމްޑީޕީއަށް ތާއިދު ބޮޑު ބައެއް ދާއިރާތަކުގެ އަގުލަބިއްޔަތު ގެއްލުމުންނެވެ.

"އަޅުގަނޑުމެން ބަލާނީ ރައްޔިތުންނަށް ހިދުމަތްކުރުމަށްޓަކާ އެކަން ކުރެވެން އޮތް ގޮތެއް." ނޫސްވެރިޔަކު ކުރެއްވި ސުވާލަކަށް ޖަވާބުދެއްވަމުން ރައީސް ވިދާޅުވި އެވެ.

ރައީސް ވިދާޅުވީ، ސަރުކާރުގެ ޕީއެސްއައިޕީގެ ޕްރޮޖެކްޓްތައް ހިންގަމުންދިޔައިރުގައިވެސް ކުޑަ ރަށެއް ބޮޑު ރަށެއް، މިރަށަކީ އެމްޑީޕީއަށް ތާއިދުކުރާ ރަށެއް ތޯ ނުވަތަ އެ ރަށަކީ ޕީޕީއެމަށް ތާއިދުކުރާ ރަށެއްތޯ ބަލާފައެއް ނޯނާނެ ކަމަށެވެ. އަދި އެހެން ޕާޓީއަކަށްވެސް ތާއީދު އޮތް ރަށެއް ތޯ ބަލާފައިނުވާނެ ކަމަށެވެ.

"ކޮންމެ ރަށެއްގައިވެސް ހުރި ކަންތައްތައް ދެނެގަނެ އެކަންތައްތަކަށް ހައްލު ހޯދުމަށްޓަކާ މަސައްކަތް ކުރަމުން މިއަންނަނީ.އެގޮތުން މާލޭ ސިޓީގައިވެސް މެޖޯރިޓީ ނެތްނަމަވެސް ސަރުކާރުގައި ނެތް ނަމަވެސް އެޔަކަށް އަޅުގަނޑުމެން ނުބަލާނަން. ރައްޔިތުންނަށް ދޭން ޖެހޭ ހިދުމަތްތައް ދިނުމުގައި ގާނޫނޫގައި ކަނޑައަޅާފައިވާ ކަންތައްތައް ކުރުމުގައި ސަރުކާރުން ވެދޭނެ ޖެހޭ އެހީތެރިކަމެއް އެއްބާރުލުމެއް ސަރުކާރު ދޭންނަން." ރައީސް ވިދާޅުވި އެވެ.