"ބިންގާ"ގެ ނަމުގައި ސްކޫލުތަކުގައި ހާއްސަ ޕްރޮގްރާމެއް ފަށަނީ

ދަރިވަރުންގެ އަހުލާގު ރަނގަޅު ކުރަން "ބިންގާ"ގެ ނަމުގައި ހާއްސަ ޕްރޮގްރާމެއް ފަށަން އެޑިއުކޭޝަން މިނިސްޓްރީން ސްކޫލުތަކަށް އަންގައިފި އެވެ.

ކޮންމެ މަހަކަށް ވަކި ޝިޔާރެއް ކަނޑައަޅައިގެން ކުރިއަށް ގެންދާ މި ޕްރޮގުރާމުގެ، ފެބުރުވަރީ މަހަށް ކަނޑައަޅާފައިވާ ޝިޔާރަކީ ޝުކުރުކުރުމެވެ.

އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ސޮއިކުރައްވައި ސްކޫލްތަކަށް މިދިޔަ ބުރާސްފަތި ދުވަހު ފޮނުއްވި ސާކިއުލާގައި ބުނެފައި ވަނީ އެ ޕްރޮގްރާމަކީ ދަރިވަރުންގެ ކިބައިގައި ރިވެތި ސިފަތަކާއި އާދަތައް ހަރުލެއްވުމަށް އެހީވާން ކުރިއަށް ގެންދަން ނިންމެވި ޕްރޮގްރާމެއް ކަމަށެވެ.

މި ޕްރޮގުރާމަކީ ސްކޫލާއި ބެލެނިވެރިންނާއި މުޅި މުޖުތަމައުގެ ބައިވެރިވުމާއެކު ކުރިއަށްގެންދިއުމަށް ހަމަޖައްސާފައިވާ ޕްރޮގްރާމެކެވެ.

މި ސާކިއުލާގައި މިނިސްޓަރު އެދިވަޑައިގެންފައި ވަނީ އެ ސްކޫލަކުން ކުރަންޖެހޭ ކަންތައްތައް އެ ސްކޫލަކުން ކުރިއަށް ގެންދިޔުމަށެވެ.

ކޮންމެ މަހެއް ފެށުމުގެ ކުރިން އެމަހަކަށް، ކަނޑައަޅާފައިވާ ތީމް، ސްކޫތަކަށް އެޑިޔުކޭޝަން މިނިސްޓްރީން އަންގާނެއެވެ.

ޕްރޮގްރާމްގައި ކުރިއަށް ގެންދަން ޖެހޭ ހަރަކާތްތައް

ބިންގާ ޕްރޮގްރާމް ވިލަރެސްކުރުމަށް ހާއްސަ ކޮމިޓީއެއް އެޑިއުކޭޝަން މިނިސްޓްރީން ވަނީ އެކުލަވާލައިފަ އެވެ. ތީމާ ގުޅޭގޮތުން ކުރިއަށް ގެންދާނެ ހަރަކާތްތައް ސްކޫލުތަކާއި ހިއްސާކުރުމާއި ޕްރޮގްރާމް ކުރިއަށްގެންދަން އެހީތެރިވުމާއި ޕްރޮގްރާމް ކުރިއަށްދާ ގޮތް ވަޒަންކުރުމުގެ ޒިންމާ ހަވާލުކޮށްފައި ވަނީ އެ ކޮމެޓީއާ އެވެ.