ނަޝީދަށް ދިން ހަމަލާއާއި ގުޅިގެން ފިޔަވަޅު އަޅަން އިދިކޮޅު ޕާޓީތަކުން ގޮވާލައިފި

ރައީސް ނަޝީދުގެ ހަށިކޮޅަށް އަމާޒުކޮށް މިރޭ ދިން ހަމަލާ އިިދިކޮޅި ޕާޓީތަކުން ކުށްވެރިކޮށްފި އެވެ. ޕާޓީތަކުން ވަނީ މިހަމަލާ ތަހުގީގުކޮށް ފިޔަވަޅު އެޅުމަށް ވަނީ ގޮވާލާފައެވެ.

ނަޝީދަށް އަމާޒުކޮށް ދިން ހަމަލާ ކުށްވެރިކޮށް، އިދިކޮޅު ޕީޕީއެމް/ ޕީއެންސީ ކޯލިޝަނުން ނެރުނު ބަޔާނުގައި ވަނީ އެ ހަމަލާގެ ހަގީގަތް ހޯދުމަށް އަވަސް ތަހުގީގެއް ހިންގުމަށް ދައުލަތުގެ ކަމާ ބެހޭ މުއައްސަސާތަކަށް ގޮވާލައިފަ އެވެ. ސަރުކާރު ކޯލިޝަންގައި ހިމެނޭ މޯލްޑިވްސް ރިފޯމް މޫވްމަންޓް (އެމްއާރުއެމް) އާއި ޖުމްހޫރީ ޕާޓީ (ޖޭޕީ) އިން ވެސް ވަނީ ނަޝީދަށް އަމާޒުވި، ހަމަލާ ކުށްވެރިކޮށްފަ އެވެ.

އެ އަމަލު ރާވައި ހިންގުމުގައި ބައިވެރިވި ހުރިހާ ފަރާތްތައް ހޯދައި، ގާނޫނުގެ ކުރިމައްޗަށް ގެނެސް ގާނޫނުން ކަނޑައަޅާފައިވާ އެންމެ ހަރުކަށި އަދަބ ދިނުމަށް ވެސް އިދިކޮޅު ކޯލިޝަނުން ގޮވައިލަ އެވެ.

އެކި ޕާޓީތަކަށް ނިސްބަތްވާ ސިޔާސީ އެކި ބޭފުޅުން ވެސް އަންނަނީ ނަޝީދަށް ދިން ހަމަލާ ކުށްވެރިކުރަމުންނެވެ. އެގޮތުން ކުރީގެ ދެ ރައީސުން ކަމަށްވާ މައުމޫން އަބްދުލްގައްޔޫމާއި ޑރ. މުހައްމަދު ވަހީދު ވެސް އެ އަމަލު ކުށްވެރިކުރެއްވި އެވެ.