ކުޅުދުއްފުށީގައި ފުލުހެއްގެ ސައިކަލަށް ގެއްލުންދީފި

ކުޅުދުއްފުށީގައި ފުލުހެއްގެ ސައިކަލަށް ބަޔަކު ގެއްލުންދީފި އެވެ. ގެއްލުންދީފައިވަނީ އެ ފުލުސް މީހާ ދިރިއުޅޭ ގޭގެ ތެރޭގައި ބަހައްޓާފައި ހުއްޓަ އެވެ.

ރޭ ދަންވަރު ގޭތެރޭގައި ބަހައްޓާފައި ހުއްޓާ، ފާރުމަތިން އަރާ ތޫނު އެއްޗަކުން ސައިކަލްގެ މަޑި ވަނީ އެތަކެއްތަނުން ކަފާލާފަ އެވެ. އަދި ސައިކަލްގެ މައްޗަށް ކުނިތަކެއްވެސް އަޅާލާފައިވެ އެވެ.

މިކަމާ ގުޅިގެން ފުލުހުން ބުނީ، އެފަދަ މައްސަލައެއް ހުށަހެޅިފައިވާކަމަށާ އެކަން ބަލަމުންދާ ކަމަށެވެ. އެކަމާ ގުޅިގެން މިހާތަނަށް މިހަކު ހައްޔަރުކޮށްފައެއް ނުވެ އެވެ.

މި ފުލުސް މީހާގެ ސައިކަލަށް މީގެ ކުރިންވެސް ބަޔަކު ވަނީ ގެއްލުންދީފަ އެވެ.