ކަރަންޓީނުގައި ތިބި ބަޔަކު އުސޫލާ ހިލާފުވުމުން ފިޔަވަޅު އަޅައިފި

ކުޅުދުއްފުށީގައި ކަރަންޓީނުކޮށްފައި ތިބި ބަޔަކު އުސޫލާ ހިލާފުވުމުން ޖޫރިމަނާކޮށްފި އެވެ. ހޯމް ކަރަންޓީނުގައި ތިބޭ ފަރާތްތަކުން އުސޫލާ ހިލާފުވާކަމުގެ ޝަކުވާތައް އަންނަނީ ތަކުރާރުކޮށް، ކަމާ ގުޅުން ހުރި އިދާރާތަކަށް ލިބެމުންނެވެ.

އެހެންވުމުން އެކަން ބެލުމަށް މޭޔަރު އާތިފް އިސްވެ ހުންނަވައިގެން އިދާރާތަކާއެކު ވަނީ ކަރަންޓީނުކޮށްފައި ތިބި ގެތަކަށް ޒިޔާރާތްކޮށް އުސޫލާ އެއްގޮތަށް އަމަލުކުރޭތޯ ބަލައި ޔަގީންކުރަމުންނެވެ.

އެގޮތުން ހޮނިހިރު ދުވަހުވެސް ވަނީ ބައެއް ގެތަކަށް އިދާރާތަކުން ގޮސް، އެޗްޕީއޭގެ އުސޫލުތަކަށް އަމަލުކުރޭތޯ ބަލާފަ އެވެ. އިއްޔެ ގޮސް ބެލިބެލުމުން ތިން ގެޔެއް އުސޫލާ ހިލާފުވެފައިވާތީ 8 މީހަކު ވަނީ ޖޫރިމަނާކޮށްފަ އެވެ.

ކުޅުދުއްފުށީ ކައުންސިލުން ބުނީ ކުރިއަށްއޮތްތަނުގައިވެސް ކަރަންޓީނުކޮށްފައިހުރި ގެތަކަށް އިދާރާތަކުން ގޮސް އުސޫލާ އެއްގޮތަށް އަމަލުކުރޭތޯ ބަލާނެ ކަމަށެވެ. ކައުންސިލުން ބުނީ ކަރަންޓީނު އުސޫލާ އެއްގޮތަށް ހުރިހާ ފަރާތްތަކުންވެސް އަމަލުކުރުމަށް އިލްތިމާސްކޮށްފަ އެވެ.