ނަޞްރުގެ ދުވަހުގެ ތަމްސީލް މުބާރާތުގެ އެއްވަނަ އޭއީސީއަށް

ނަޞްރުގެ ދުވަހާ ގުޅުވައިގެން ކުޅުދުއްފުށީގެ ސްކޫލުތަކަށް ހުޅުވާލި ތަމްސީލްކުރުމުގެ މުބާރާތުން އެއްވަނަ ހދ އަތޮޅު ތައުލީމީ މަރުކަޒު ހޯދައިފި އެވެ.

ކުޅުދުއްފުށި ސިޓީ ކައުންސިލާއި އަފީފުއްދީން ސްކޫލުގެ ގުޅިގެން މިއަހަރުގެ ނަސްރުގެ ދުވަސް ކުލަގަދަކޮށް ފާހަގަކުރަމުންދާ އެ ދުވަހާ ގުޅުވާ ބޭއްވި ތަމްސީލް މުބާރާތް އޮތީ ހޯމަ ދުވަހުގެ ރޭ ހދ އޭއީސީ ހޯލުގައި އެވެ.

ކުޅުދުއްފުށީގެ ތިން ސްކޫލުން ބައިވެރިވެ، ސްކޫލަކު ތަމްސީލެއް ހުށަހެޅި މި މުބާރާތުގައި ތަމްސީލްތައް ހާއްސަކޮށްފައިވަނީ ނަޞްރުގެ ދުވަހުގެ ބަތޮލު ޝަހީދު ހުސެއިން އާދަމްގެ ހަޔާތާ ގުޅުވާ، ދުވަހުގެ ހާދިސާއާއެކު އެވެ.

މި މުބާރާތުން އޭއީސީ އެއްވަނަ ހޯދީ 263 މާކްސް ހޯދައިގެންނެވެ. 257 މާކްސް ހޯދައިގެން ޖަލާލުއްދީން ސްކޫލް ދެވަނަ ހޯދިއިރު ތިންވަނަ ލިބިފައިވަނީ އަފީފުއްދީން ސްކޫލަށެވެ. އެ ސްކޫލަށް ލިބިފައިވަނީ 242 މާކްސް އެވެ.

މި މުބާރާތުގެ މަގުސަދަކީ ނަޞްރުގެ ދުވަހުގެ ހާއްސަކަމާ ދުވަހުގެ މުހިންމުކަން ދަރިވަރުންނަށް އަންގައިދީ ގައުމިއްޔަތުގެ ރޫޙް ދަރިވަރުންގެ ހިތްތަކުގައި ދިރުވާ އާލާކުރުންކަމަށް ސިޓީ ކައުންސިލް މައުލޫމާތުދެ އެވެ.

މި ހަރަކާތަށް ސްކޫލުތަކުން ބޮޑު ތަރުހީބެއް ލިބިގެންދިޔައި ތަމްސީލް ކުރިއަށްދިޔަ ވަގުތު ގިނަ އަދަދެއްގެ ދަރިވަރުންނާއި ބެލެނިވެރިން ވަނީ ހޯލަށް ވަދެ ހިތްވަރުދީފަ އެވެ.