ކޭއާރުއެޗުގައި ޕީސީއާރު ޓެސްޓް ހަދާ އަގުހެޔޮކޮށްފި

ކުޅުދުއްފުށީ ރީޖަނަލް ހޮސްޕިޓަލް (ކޭއާރުއެޗު)ގައި ޕީސީއާރު ޓެސްޓް ހަދާ އަގުހެޔޮކޮށްފި އެވެ.

ކޭއާރުއެޗުން ކޭއޯއަށް މައުލޫމާތުދެއްވި ގޮތުގައި ކޮވިޑްގެ ހާލަތާއި ގުޅިގެން ހަދަމުން ގެންދާ ޕީސީއާރު ޓެސްޓްގެ އަގު ހަމަޖެއްސެވިއިރު ނަގަމުން ގެންދިޔައީ 1050 ރުފިޔާ އެވެ.

އެހެންނަމަވެސް ޕީސީއާރު ހިދުމަތްދޭ ހުރިހާ ތަނެއްގައި އެއް އުސޫލެއް ހަމަޖެއްސުމަށްޓަކައި ހެލްތް މިނިސްޓްރީއާއި ފިނޭންސް މިނިސްޓްރީއިން ކުރެވުނު މަސައްކަތުގައި ޕީސީއާރު ޓެސްޓްގެ އަގު 750 ރުފިޔާއަށް ބަދަލުކުރުން އެންމެ ރަނގަޅުކަމަށް މިނިސްޓްރީ އޮފް ހެލްތަށް ވަނީ އެންގިފަ އެވެ.

އެހެންކަމަށްވުމާއެކު ކޭއާރުއެޗުން ޕީސީއާރު ޓެސްޓް ހަދަމުން ގެންދިޔަ އަގު 1050 ރުފިޔާއިން 750 ރުފިޔާއަށް 16 އޮކްޓޫބަރު 2021 ގެ 18:00 ން ފެށިގެން ބަދަލުކުރެވިފައިވާ ކަމަށް ކޭއާރުއެޗުން ހާމަކުރެ އެވެ.

ޕީސީއާރު ޓެސްޓް ހެދުމަށް ބޭނުންވާ ފަރާތްތަކުން ކައުންޓަރަށް ފައިސާ ދެއްކުމަށްފަހު އެކޮޅުން ދޭ މެމޯ/ރިސީޕްޓް ކޮޅާއި އައިޑީ ކާޑު ހިފައިގެން އުފަން ހިޔާއަށް ވަޑައިގަތުމުން ޓެސްޓް ހެދޭނެކަމަށް ކޭއާރުއެޗުން ބުނެ އެވެ.