ކުޅުދުއްފުށީ ގަރާޖެއްގައި އަލިފާން ރޯވެ ބޮޑެތި ގެއްލުންތަކެއް ލިބިއްޖެ

ކުޅުދުއްފުށީ ސިޓީގެ ގަރާޖެއްގައި ރޯވެ، ގަރާޖުގެ ބޮޑުބައެއް އަނދާ ގެއްލުންތަކެއް ވެއްޖެ އެވެ. މި ހާދިސާގައި އަނދާފައިވަނީ ކުޅުދުއްފުށީ މަގާންމަގުގައި ހުންނަ މެސްކޮޓް ގަރާޖެވެ.

ރޭ ދަންވަރު ހިނގި މިހާދިސާގައި އެ ގަރާޖްގައި ވެހިކަލް ދޮންނަން ބޭނުންކުރާ ބައި ބޭނުން ނުކުރެވޭވަރަށް އަނދާފައިވާއިރު، ސްޕެއާޕާޓްސް ބަހައްޓާފައި ހުންނަ ބަޔަށްވެސް ވަނީ އަލިފާނުގެ އަސަރުކޮށް ގެއްލުން ލިބިފައެވެ.

މެސްކޮޓް ގަރާޖްގައި ރޯވެގެން އުޅޭ ކަމުގެ ރިޕޯޓް އެމްއެންޑީއެފް ނޮދަން އޭރިއާ ކުޅުދުއްފުށި ފަޔަރ ސްޓޭޝަންއަށް ލިބިފައި ވަނީ ރޭ މެންދަމުން އަނބުރާ 02:48 ހާއިރުކަމަށް އެ އިދާރާއިން ވިދާޅުވެއެވެ. ފަޔަރަފައިޓަރުން ގޮސް އަލިފާން ނިއްވާލެވިފައި ވަނީ ރޭ 03:45 ހާއިރު އެވެ.

މި ހާދިސާގައި އެއްވެސް މީހަކަށް އަނިޔާއެއް ލިބިފައެއްނުވެއެވެ.