ޗާޓަރު ފްލައިޓްތަކުން ބައިލައްކައަށްވުރެ ގިނަ ޓޫރިސްޓުން

ޗާޓަރު ފްލައިޓްތަކުން ބައިލައްކައަށްވުރެ ގިނަ ޓޫރިސްޓުން މިއަހަރުގެ މިހާތަނަށް ރާއްޖެ އައިސްފި އެވެ. ޓޫރިޒަމް މިނިސްޓްރީން ހާމަކުރާގޮތުގައި މި އަހަރުގެ ޖެނުއަރީން އެކަކުން ޑިސެމްބަރުގެ ނިޔަލަށް 51,998 މީހުން ޗާޓަރު ފްލައިޓްތަކުން އައިސްފައިވާ ކަމަށެވެ.

މި އަހަރުގެ މިހާތަނަށް 12 ޗާޓަރު ފްލައިޓަކުން ރާއްޖެއަށް ޖުމްލަ 766 ފްލައިޓް މޫވްމެންޓް ވަނީ ހަދާފަ އެވެ.

ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކާގޮތުގައި މިއަހަރުގެ މިހާތަނަށް 1،162،425 ޓޫރިސްޓުން އައިސްފައިވެ އެވެ. އަދި 2020 ވަނަ އަހަރު، އެއަހަރުގެ ޑިސެމްބަރު މަހުގެ ނިޔަލަށް 555،494 ޓޫރިސްޓުން އައިސްފައިވެ އެވެ. މީގެ އިތުރުން 2019 ވަނަ އަހަރު 1،702،887 ޓޫރިސްޓުން ރާއްޖެ އައިސްފައިވެ އެވެ.

މިއަހަރުގެ މިހާތަނަށް ރާއްޖެއަށް އެންމެ ގިނަ ޓޫރިސްޓުން އައިސްފައިވަނީ އިންޑިއާއާއި ރަޝިއާ އަދި ޖަރުމަނުގެ އިތުރުން އެމެރިކާއާއި އިނގިރޭސި ވިލާތުންނެވެ.

މިއަހަރު ސަރުކާރުގެ ޓާގެޓަކީ 1.5 މިލިއަން ޓޫރިސްޓުން ގެނައުންކަމަށްވާއިރު އެމްއެމްއޭގެ ދިރާސާއިން ދެއްކި ގޮތުގައި މި އަހަރުގެ ކޮވިޑުގެ އެންމެ ރަނގަޅު ހާލަތުގައި ވެސް ރާއްޖެ އަންނާނީ 1.2 މިލިއަން މީހުންނެވެ.