މިއަހަރު މިހާތަނަށް މުދަލުގެ ޒަކާތުގެ ގޮތުގައި ދައުލަތަށް 109 މިލިއަން ރުފިޔާ ލިބިއްޖެ

މި އަހަރުގެ ސެޕްޓެންބަރު މަހުގެ ނިޔަލަށް މުދަލު ޒަކާތުގެ ގޮތުގައި ލިބުނު ފައިސާގެ އަދަދު، މިދިޔަ އަހަރު އެއްކޮށް ލިބުނު އަދަދަށް ވުރެ އިތުރުވެއްޖެއެވެ.

މޯލްޑިވްސް ޒަކާތު ހައުސްގެ ތަފާސްހިސާބުތަކުން ދައްކާ ގޮތުގައި، މި އަހަރުގެ ޖެނުއަރީން ފެށިގެން ސެޕްޓެންބަރުގެ ނިޔަލަށް މުދަލު ޒަކާތުގެ ގޮތުގައި ޖުމުލަ 109.6 މިލިއަން ރުފިޔާ ވަނީ ބަލައިގަނެފައެވެ. މިއީ މިދިޔަ އަހަރު އެއްކޮށް ލިބުނު 106.5 މިލިއަން ރުފިޔާއާ އަޅައިބަލާއިރު 2.8 މިލިއަން ރުފިޔާ އިތުރު އަދަދެކެވެ.

މި އަހަރުގެ މިހާތަނަށް ލިބުނު އަދަދަކީ މިދިޔަ އަހަރުގެ ޖުމުލަ އަދަދާ އަޅައިބަލާއިރު ގާތްގަނޑަކަށް 2.64 އިންސައްތައިގެ ކުރިއެރުމެކެވެ. މި މުއްދަތުގެ ތެރޭގައި ލިބުނު ފައިސާގެ ތެރޭގައި ހިމެނެނީ ދިވެހި ރުފިޔާއިން ލިބުނު 108.7 މިލިއަން ރުފިޔާއާއި، 34،021.41 ޑޮލަރެވެ.

މޯލްޑިވްސް ޒަކާތު ހައުސްއަކީ ދިވެހިރާއްޖޭގެ ޒަކާތުގެ ނިޒާމު ހަރުދަނާކުރުމުގެ މަގުސަދުގައި، 18 ޑިސެންބަރު 2023 ގައި އުފެއްދެވި އިދާރާއެކެވެ. އިސްލާމީ ކަންތައްތަކާ ބެހޭ ވުޒާރާގެ ދަށުން ހިންގާ މި އިދާރާގެ މައިގަނޑު މަސްއޫލިއްޔަތަކީ ޒަކާތް ބަލައިގަތުމާއި ބެހުމުގެ ނިޒާމު ހަރުދަނާކުރުމާއި، ޝަރުއީ ހަމަތަކުގެ މަތިން ޒަކާތު ފަންޑު ތަރައްގީކުރުމެވެ.

މީގެ އިތުރުން، ފަގީރުންގެ ދަފުތަރު ބެލެހެއްޓުމާއި، ޒަކާތް ލިބޭ މީހުން ފުދުންތެރި ބަޔަކަށް ހެދުމަށް މަސައްކަތްކުރުމާއި، ޒަކާތާ ގުޅޭގޮތުން އާންމުންނާއި ވިޔަފާރިތައް ހޭލުންތެރިކުރުވުމަކީ ވެސް އެ އިދާރާގެ މަސައްކަތެކެވެ.