ޑެސްޓިނޭޝަން ޕްރިންސިޕަލްގެ އުސޫލުން، ޓީޖީއެސްޓީގެ ޤާނޫނަށް ވަރަށް އަވަހަށް ބަދަލުތަކެއް ގެންނަނީ

ޓީޖީއެސްޓީގެ ގާނޫނަށް އަވަސް އިސްލާހުތަކެއް ގެންނެވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވާފައިވާ ކަމަށް ޓޫރިޒަމް މިނިސްޓަރު މުޙައްމަދު އަމީން ވިދާޅުވެއްޖެއެވެ.

މި މަހުން ފެށިގެން ބޭރުގެ ޓްރެވަލް އެޖެންޓުންގެ އަތުން ޓެކްސް ނަގާ ގޮތަށް ޖީއެސްޓީ ގާނޫނަށް ގެނައި އިސްލާހާމެދު ކަންބޮޑުވުން ފާޅުކޮށް، އެ އިސްލާހަށް އަމަލުކުރުން ފަސްކުރުމަށް ޔޫރަޕްގެ ޓުއާ އޮޕަރޭޓަރުންނާއި ޓުއާ އެޖެންޓުން ތަމްސީލްކުރާ ބައެއް އެސޯސިއޭޝަންތަކުން ދިވެހި ސަރުކާރާއި މީރާގައި ވަނީ އެދިފައެވެ.

ޖީއެސްޓީ ގާނޫނަށް އަށް ވަނަ އިސްލާހު ގެނައުމުގެ މި ބިލު ރައީސުލްޖުމްހޫރިއްޔާ ތަސްދީގުކުރައްވާފައިވަނީ މިދިޔަ އޮގަސްޓު 31 ގައެވެ.

އެއާއެކު އާ އުސޫލަށް އިސްލާހުތަކެއް ގެންނަން އުޅޭކަން މިނިސްޓަރު ހާމަކުރެއްވީ ގައުމީ ފަތުރުވެރިކަމުގެ ދުވަސް ފާހަގަކުރުމަށްޓަކައި ރޭ ބޭއްވި ހާއްސަ ޖަލްސާގައި ވާހަކަދައްކަވަމުންނެވެ.

މިނިސްޓަރު އަމީން ވިދާޅުވީ، ވޭތުވެދިޔަ ދެ މަސްދުވަހުގެ ތެރޭގައި ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ދެއްކުމުގެ އިތުރު ބައިތަކެއް ހިމަނައިގެން ޤާނޫނަށް ބަދަލުތަކެއް ގެނެވިފައިވާ ކަމަށެވެ. އަދި މި ބަދަލުތަކާ ގުޅިގެން ފަތުރުވެރިކަމުގެ ދާއިރާގެ އިސް ފަރާތްތަކާއި ޓްރެވަލް އެޖެންޓުންގެ ވަރަށް ބޮޑެތި ކަންބޮޑުވުންތަކެއް ހުރިކަން ސަރުކާރަށް ފާހަގަކުރެވިފައިވާ ކަމަށް ވެސް އެމަނިކުފާނު ވިދާޅުވިއެވެ.

މިނިސްޓަރު ވިދާޅުވީ މި ކަންބޮޑުވުންތައް މައިގަނޑު ގޮތެއްގައި ގުޅިފައިވަނީ ކަނޑައެޅިފައިވާ މުއްދަތުތަކާއި އެކަމުގައި ހިމެނޭ އެހެނިހެން ސަބަބުތަކާކަމަށެވެ. އަދި މި މައްސަލަތަކާ ގުޅިގެން އިންޑަސްޓްރީގެ ގިނަ ފަރާތްތަކަކުން ރައީސުލްޖުމްހޫރިއްޔާގެ އަރިހަށް ހުށަހެޅުންތައް ފޮނުވާފައިވާ ކަމަށް ވިދާޅުވިއެވެ.

ރޭގެ ޖަލްސާގައި ރަސްމީކޮށް އިފްތިތާޙްކުރި "ވިޒިޓް މޯލްޑިވްސް އިޔާ 2027" ގެ ލޯގޯ އަދި ޝިއާރަށް އިޝާރާތްކުރައްވައި މިނިސްޓަރު ވިދާޅުވީ، ކުރިއަށް އޮތް އަހަރުތަކަކީ ރާއްޖޭގެ ފަތުރުވެރިކަމުގެ ކާމިޔާބީތައް ފުޅާ ދާއިރާއެއްގައި ފާހަގަކޮށް، ދުނިޔޭގެ ވާދަވެރިކަމުގެ ތެރޭގައި ރާއްޖޭގެ މަގާމު އިތުރަށް ހަރުދަނާކުރުމަށް ލިބޭނެ ރަނުގެ ފުރުސަތެއް ކަމަށެވެ. އަދި މިކަމުގެ ހެޔޮ މަންފާ ދިވެހި އިޤްތިޞާދަށް ކުރާނެ ކަމުގެ ފުރިހަމަ ޔަގީންކަން އެބައޮތް ކަމަށްވެސް ވިދާޅުވިއެވެ.