ތިން ސަރަަހައްދެއްގައި ވެކްސިން ރައްކާކުރާ ސެންޓަރުތަކެއް ގާއިމްކުރަނީ

ރާއްޖޭގެ ތިން ސަރަހައްދެއްގައި ވެކްސިން ރައްކާކުރަން ސެންޓަރުތަކެއް ގާއިމުކުރަން ނިންމާފައިވާ ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެ އެވެ.

ގދ. ތިނަދޫގައި އަޅަން ނިންމާފައިވާ ޓާޝަރީ ހޮސްޕިޓަލްގެ މަސައްކަތް ނުފެށި ލަސްވާތީ އެކަމާ ގުޅޭ ގޮތުން ސުވާލުކުރުމަށް ނަސީމް މިއަދު ވަނީ މަޖިލީހަށް ހާޒިރު ކޮށްފަ އެވެ.

އެގޮތުން ސަރުކާރުން ކުރިއަށް ގެންދަން ރާވާފައިވާ މަޝްރޫއުތަކާއި ބެހޭގޮތުން މިނިސްޓަރު ވިދާޅުވީ ވޯލްޑް ބޭންކްގެ ލޯންގެ އެހީގައި ރާއްޖޭގެ ތިން ސަރަހައްދެއްގައި ވެކްސިން ރައްކާކުރާނެ ސެންޓަރުތައް ގާއިމުކުރާނެ ކަމެވެ.

އެގޮތުން މާލޭ ސަރަަހައްދުގައ ހުޅުމާލޭ އަދި އުތުރުން ށ. ކޮމަންޑޫ އަދި ދެކުނުން ގދ. ގައްދޫގައި ވެކްސިން ރައްކާކުރާ ސެންޓަރުތައް ގާއިމުކުރާނެ ކަމަށް ނަސީމް ވިދާޅުވި އެވެ.

ވެކްސިން ރައްކާކުރާ ސެންޓަރުތައް ގާއިމުކުރަން ނިންމި އިރު މިހާރު ދެމުންގެންދާ ކޮވިޑް ވެކްސިންގެ ބައެއް ވައްތަރުގެ ވެކްސިންތައް ބަހައްޓަން ޖެހެނީ ވަރަށް ފިނީގަ އެވެ.