އިހްޔާ ފޯރަމްތައް މިއަހަރު އަތޮޅުތެރޭގައިވެސް ބާއްވަނީ

ރަމަޟާންމަހުގެ އިޙްޔާ ފޯރަމްތައް މިއަހަރު މާލޭގެ އިތުރުން ރާއްޖޭގެ 3 ސިޓީއާއި ރ.އުނގޫފާރުގައި ކުރިއަށް ގެންދިއުމަށް ނިންމާފައިވާ ކަމަށް އިސްލާމިކް މިނިސްޓްރީން ވިދާޅުވެއްޖެއެވެ.

މި ޕްރޮގްރާމަކީ އާންމުންނަށް ބައިވެރިވެވޭ ގޮތަށް ކުރިއަށްގެންދާ، ދީނީ މައުލޫމާތު ދިނުމުގެ ސެޝަންތަކެކެވެ. އެގޮތުން މި ޕްރޮގްރާމުގެ ތެރެއިން ދީނީ އިލްމުވެރިން މެދުވެރިކޮށް އެކި މައުޟޫތަކަށް ވާހަކަދެއްކުމާއި މައުލޫމާތުދިނުން ހިމެނެއެވެ.

މިއަހަރުގެ ރަމަޟާން މަހަށް ރާވާފައިވާ ކަންކަމުގެ ތެރެއިން، މާލެއެކޭ އެއް ފެންވަރެއްގައި އިހްޔާ ފޯރަމްތައް އަތޮޅުތެރޭގައިވެސް ބޭއްވުމަށް އިސްލާމިކް މިނިސްޓްރީން ވަނީ ނިންމާފައެވެ.

މާލޭގައި ބާއްވާ ފޯރަމްތައް ޓީވީއެމުން ދެއްކުމަށްވަނީ ހަމަޖެހިފައެވެ. އަދި އަތޮޅުތަކުގައި ބާއްވާ ފޯރަމްތައް ޕީއެސްއެމް ނިއުސްއިން ލައިވް ކުރާނެއެވެ. އަތޮޅުތަކުގައި ބާއްވާ އިހްޔާ ފޯރަމްތައް އޮންނާނީ ހަފްތާ ބަންދުގައި ކަމަށް އިސްލާމިކް މިނިސްޓްރީން ވިދާޅުވެއެވެ.