ރޯހައުސްތައް ނިންމާލެވޭނެ ތާރީހެއް ނުދެއްވި، ވިދާޅުވީ ވަރަށް އަވަހަށް ނިންމާލެވޭނެކަމަށް

ކުޅުދުއްފުށީގައި 2011 ވަނަ އަހަރު ހަދަން ފަށާފައިވާ ހައުސިން ޔުނިޓްތަކުގެ ތެރެއިން ވީރާނާވާން ދޫކޮށްލި ރޯހައުސްތައް މި ސަރުކާރުން މަރާމާތުކޮށް ހައްގުވެރިންނަށް ދަނީ ހަވާލުކުރަމުންނެވެ. އެގޮތުން މާފަލުހިޔާގެ ރޯހައުސްތައް ވަނީ މަރާމާތުކޮށް ހަވާލުކޮށްފަ އެވެ.

މިހާރު މަރާމާތުކުރަމުންދަނީ ވެލިގަނޑުގައި ހުރި ރޯހައުސްތަކާއި ކަނބޯރަނި ހިޔާގައި ނުނިމިހުރި ރޯހައުސްތަކެވެ. ނުނިމި ހުރި އެ 105 ރޯހައުސް ނިންމަން 06 އެޕްރީލް 2021 ގައި ހަވާލުކުރީ ދޮންބޭޒް ޕްރައިވެޓް ލިމިޓެޑާ، 8 މަސް ދުވަސްތެރޭ ނިންމާގޮތަށެވެ. އެކަމަކު އެ އެ މުއްދަތަށް މަސައްކަތް ނުނިމި ދިގުލައިދާތީ ރޯހައުސްގެ ހައްގުވެރިން ދަނީ ކަންބޮޑުވުންފާޅުކުރަމުންނެވެ.

ސިޓީ ކައުންސިލުން އެންމެ ފަހުން ބޭއްވި ރައްޔިތުންގެ ބައްދަލުވުމުގައި ރައްޔިތަކު އެކަމުގެ ކަންބޮޑުވުންފާޅުކުރުމުން، މޭޔަރު އާތިފް ވިދާޅުވެފައިވަނީ ކަނޑައެޅުނު ތާރީހަށް މަސައްކަތް ނިންމާނުލެވުނީ ފަސް ފަހަރެއްގެ މަތިން ރޯހައުސްތައް ލިބޭ ފަރާތްތަކުން މަސައްކަތް ހިނގާތަނަށް ގޮސް މަސައްކަތަށް ގެންނަށް ޖެހޭ ބަދަލުތައް ބަލާ އެތައް ބައިވަރު ރަނގަޅު ކަންތައްތަކެއް އެ ޕްރޮޖެކްޓަށް އަލުން އިތުރު ކުރެވުމުން ކަމަށެވެ.

އެގޮތުން ސިޑިތަކުގެ ރޭލިންގ އެސްއެސްއަށް ބަދަލުކުރުމާއި، މުއްޓާއި ބައިވަރު އެހެން ކަންތައްތަކެއް ރަނގަޅު ކުރެވި ބަޖެޓްވެސް އިތުރު ކުރެވިފައިވާ ކަމަށާޢި މުއްދަތު އިތުރުކުރީ އެ ސަބަބުތަކަށްޓަކާކަމަށް މޭޔަރު ވިދާޅުވި އެވެ.

އެ ބައްދަލުވުމުގައި ރޯހައުސްތައް ނިންމާލެވޭނެ ތާރީހަކަށް މޭޔަރު ދެއްވީ މިދިޔަ އޯގަސްޓްމަހުގެ ނިޔަލަށެވެ. އެހެންނަމަވެސް އެ މުއްދަތަށްވެސް ރޯހައުސްތައް ނިންމާނުލެވުމުން ރޯހައުސްތަކުގެ ހައްގުވެރިން އަންނަނީ ކަންބޮޑުވުންފާޅުކުރަމުންނެވެ.

މިކަމާ ގުޅިގެން ކޭއޯއިން ސުވާލުކުރުމުން މޭޔަރު އާތިފް ވިދާޅުވީ، ހައުންސިންގ ޔުނިޓްތައް އޯގަސްޓަށް ނިންމާ ނުލެވި ލަސްވާ މައިގަނޑު ސަބަބަކީ ސިޑިތަކުގެ ރޭލިންގ އެސްއެސްއަށް ބަދަލުކުރާތީ ކަމަށާއި އެކި ޔުނިޓްތަކަށް ރޭލިން ހަދަން ޖެހެނީ އެކި ސައިޒަށް، ކަސްޓަމައިޒްކޮށްކަމަށްވާތީ ކަމަށެވެ.

ހައުންސިންގ ޔުނިޓްތައް ނިންމާނެ ވަކި ތާރީހެއް ނުދެއްވަ މޭޔަރު ވިދާޅުވީ އެ މަސައްކަތް ވަރަށް އަވަހަށް ނިންމާލެވޭނެ ކަމަށާއި އަދި އެތަނުގައި ހަދައި މައިޒާނުގެ މަސައްކަތްވެސް ވަރަށް އަވަހަށް ނިންމާލެވޭނެކަމަށެވެ.