ބީއެމްއެލްއަށް ދިގު މުއްދަތަކަށް ހިދުމަތްކޮށްފައިވާ މުވައްޒަފުންގެ އަގު ވަޒަންކޮށްފި

ބޭންކް އޮފް މޯލްޑިވްސް (ބީއެމްއެލް) އަށް ދިގު މުއްދަތަކަށް ހިދުމަތްކޮށްފައިވާ މުވައްޒަފުންގެ އަގު ވަޒަންކޮށް ހާއްސަ އެވޯޑެއް ދީފިއެވެ.

މިދިޔަ އަންގާރަ ދުވަހުގެރޭ ދަރުބާރުގޭގައި ބޭއްވި ހާއްސަ ހަފުލާއެއްގައި ބީއެމްއެލްއަށް 15 އަހަރާއި 40 އަހަރާ ދެމެދުގެ މުއްދަތަކަށް ހިދުމަތްކޮށްފައިވާ މުވައްޒަފުންނަށް ވަނީ އެވޯޑްތައް ދީފައެވެ.

މި އަހަރު އެ ބޭންކުގެ 40 ވަނަ އަހަރީ ދުވަސް ފާހަގަކުރަމުން ދާއިރު، 40 އަހަރު ބޭންކަށް ޚިދުމަތްކުރި ތިން މުވައްޒަފަކަށް ވަނީ އެވޯޑް ދީފައެވެ. އެގޮތުން އެ ތިން މުވައްޒަފުންނަކީ ބީއެމްއެލްގެ ޑެޕިއުޓީ ސީއީއޯ ޢާއިޝަތު ނޫރައްދީންއާއި ޑެވެލޮޕްމެންޓް ބޭންކިން ޑައިރެކްޓާ ފާތިމަތު މަނިކެއާއި ސީނިއާ ފެސިލިޓީސް އޮފިސަރު މޫސާ މުޙައްމަދެވެ.

މީގެ އިތުރުން 35 އަހަރު ބޭންކުގައި ޚިދުމަތް ކޮށްދެއްވި އެ ބޭންކުގެ ސީނިއާ ރިކޮންސިލިއޭޝަން އޮފިސާ، ފިރާޤު އަޙްމަދަށްވެސް ވަނީ އެވޯޑް ދީފައެވެ.

މި މުވައްޒަފުންނާއެކު ޖުމްލަ 68 މުވައްޒަފަކަށް ރޭގެ ހަފުލާގައި އެވޯޑް ދީފައިވެއެވެ.