ގޮއިދޫގައި މިއޮތީ ކަރާ، ހަތަރު ދުވަހުން 30 ޓަނު ކަރާ ވިކިއްޖެ

އުތުރުގައި އެންމެ ފުޅާ ދާއިރާއެއްގައި ދަނޑުވެރިން ކުރަމުން އަންނަނީ ށ ގޮއިދޫގައި އެވެ. ކޮންމެ އަހަރެއްގެވެސް ރޯދަމަހާ ދިމާކޮށް އެރަށުގެ ދަނޑުވެރިން ވަރަށް ބޮޑަށް ތައްޔާރުވެ، ރަހަމީރު ކޮލިޓީ ކަރާ ބާޒާރަށް ނެރެ އެވެ. އެހެން އަހަރުތަކާ އެއްގޮތަށް މިއަހަރުވެސް ގޮއިދޫ ކަރާ ދަނޑުތައް ފައްކާކުރީ ރޯދަމަހަށްށެވެ.

ގޮއިދޫ ކައުންސިލްގެ ރައީސް އިބްރާހިމް ޝާހިދު ކޭއޯއަށް މައުލޫމާތު ދެއްވަމުން ވިދާޅުވީ ރަމަޟާންމަހު 4 ވަނަ ދުވަހަށް މިއަދުވާއިރު މިއަދާހަމައަށް ގާތްގަނޑަކަށް 30 ޓަނުގެ ކަރާ ރަށުން ބޭރުކުރެވިފައިވާނެ ކަމަށެވެ.

ޝާހިދު ވިދާޅުވީ ގޮއިދޫ ކަރާ އާންމުކޮށް ގެންގޮސްފައިވާނީ އެ އަތޮޅުތެރޭގެ ރަށްތަކުގެ އިތުރުން ކުޅުދުއްފުއްޓަށް ކަމަށެވެ.

"ކުޅުދުއްފުއްޓަށް ކަނނޭގެ އެންމެ ބޮޑު އަދަދެއް ގެންދެވިފައިވާނީ، ދެން ކޮންމެވެސް މިންވަރަކަށް ރ އަތޮޅަށްވެސް ގެންދެވިފައިވާނެ. ނަމަވެސް އަދި މާލެއާހަމައަކަށް ރަށުން ކާރާއެއް ނުއެއްގެންދެވޭ ނަމަވެސް ކުރިއަށްއޮތް ހަފުތާ ފުރާ ބޯޓުތަކުން މާލެއަށްވެސް ކަރާ ފޮނުވޭނެކަމަށް މި ގަބޫލުކުރަނީ." ޝާހިދު ވިދާޅުވި އެވެ.

އޭނާ ވިދާޅުވީ ބާޒާރުގައި ތަކެއްޗަށްއައި ބަދަލާ ގުޅިގެން ދަނޑުވެރިން ބޭނުންކުރާ ތަކެތީގެ އަގުތައްވެސް އުފުލި ދަނޑުތަކަށް ކުރާހޭދަވެސް އިތުރުވެފައިވާކަމަށެވެ. ނަމަވެސް މި ފަހަރު ކަރާގެ ވިޔަފާރިވެސް ރަނގަޅުވާނެކަމަށް އުންމީދުކުރެވޭ ކަމަށް ޝާހިދު ވިދާޅުވި އެވެ.

ރޯދަމަހު ކަރާ ވިއްކަން ފެށީ 20 ރުފިޔާއަށް ކަމަށާއި ނަމަވެސް އެ ރަށަށްގޮސްގެން 17 ރުފިޔާއަށް ނުވަތަ ގިނައިން ނަގާނަމަ ޑިސްކައުންޓް ރޭޓްތަކެއްގައި ކަރާ ލިބޭނެ ކަމަށެވެ.

"

"ގޮއިދޫ ކަރާ ހަމަ ކޮލިޓީވާނެ. ތަފާތުވާނެ. ގޮއިދޫ ކަރާ އެއީ ބުރޭންޑެއް. އެ ޔަގީންކަން އަޅުގަނޑުދެން." ގޮއިދޫ ކައުންސިލްގެ ރައީސް ޝާހިދު ވިދާޅުވި އެވެ.

ގޮއިދޫ ކައުންސިލްގެ ރައީސް ޝާހިދު

"ގޮއިދޫ ކަރާ ހަމަ ކޮލިޓީވާނެ. ތަފާތުވާނެ. ގޮއިދޫ ކަރާ އެއީ ބުރޭންޑެއް. އެ ޔަގީންކަން އަޅުގަނޑުދެން." ގޮއިދޫ ކައުންސިލްގެ ރައީސް ޝާހިދު ވިދާޅުވި އެވެ.

މި އަހަރު 250 އެއްހާ ދަނޑުގައި އެ ރަށުގައި ކަރާ ހައްދާއިރު އެދަނޑުތަކުގައި މަސައްކަތްކުރަން 400 އެއްހާ ދަނޑުވެރިން އުޅެ އެވެ. ޝާހިދު ވިދާޅުވީ އެ ރަށުގެ ދަނޑުވެރިންނަކީ އެކަމުގެ މައުލޫމާތާއި ތަމްރީނުގެ އިތުރުން ތަޖުރިބާ ރަނގަޅަށް ހޯދައިގެން އެ މަސައްކަތް ކުރާ ފަރާތްތަކެވެ.

ރާއްޖޭން ބޭރުން ކަރާ އެތެކުރާތީ އެކަމުގެ ކަންބޮޑުވުންފާޅުކުރައްވަމުން އޭނާ ވިދާޅުވީ، ބޭރުން ކަރާއެތެރެކުރަން ފަށައިފިނަމަ ދަނޑުވެރިން ދަނޑު ހައްދަން މި ކުރާ ބޮޑު ހޭދައަށް ދަތިކަމެއް އަންނާނެ ކަމަށެވެ. އެހެންކަމުން ކާނާގެ ރައްކާތެރިކަން ކަށަވަރުކުރުމަށް ބޭރުން ގެންނަ ކާބޯތަކެތީގެ ބަދަލުގައި މި ފަދަތަކެތި ބޭނުންކުރުމަށް އޭނާ އެދިލެއްވި އެވެ.

އުތުރުގައި، ރޯދައާ ދިމާކޮށް އެންމެ ފުޅާ ދާއިރާއެއްގައި ކަރާ ހައްދާ ގޮއިދޫން ފަސޭހައިން އެތަކެތި ގަނެވޭނެ އިންތިޒާމު ކައުންސިލް މެދުވެރިކޮށް ވަނީ ހަމަޖައްސައިދީފަ އެވެ. އެގޮތުން ކަރާ އަދި ދަނޑުވެރިކަމުން އެރަށުގައި އުފައްދާ ތަކެތި ގަންނަ ބޭނުންވާ ފަރާތްތަކުން ކައުންސިލްގެ ރައީސް އިބުރާހިމް ޝާހިދަށް ގުޅުއްވައިގެން ހަމަޖެހޭނެ އެވެ. ޝާހިދުގެ ނަމްބަރަކީ 9673878 އެކެވެ.