މަތީ ޘާނަވީ ނިންމާ އިމްތިޙާނުތަކުގެ މަތީ އަރުތަވެރީންގެ އިނާމުގެ ޓައިޓަލް ޕާރޓްނަރަކަށް ދިރާގު

މަތީ ޘާނަވީ ނިންމާ އިމްތިހާނުތަކުގެ މަތީ އަރުތަވެރީންގެ އިނާމު 2021-2022ގެ ޓައިޓަލް ޕާޓްނަރަކަށް ވުމަށް މިނިސްޓްރީ އޮފް އެޑިއުކޭޝަނާއިއެކު ދިރާގު ސޮއިކޮށްފިއެވެ.

މިއީ 2021 އަދި 2022 ވަނަ އަހަރުގެ މަތީ ޘާނަވީ ނިންމާ އިމްތިހާނުތަށް ހަދާފައިވާ ދަރިވަރުންގެ ތެރެއިން ގައުމީ ގަދަ ދިހައެއް ހާސިލްކޮށްފައިވާ ދަރިވަރުންގެ ކާމިޔާބީ ފާހަގަކުރުމަށް ބާއްވާ ގައުމީ އިނާމު ދިނުމުގެ ހަފްލާއެވެ.

މިގޮތުން އޭލެވެލް އިމްތިހާނުގައި ގަދަ 10 ރޭންކިންގ ހާސިލްކުރި ދަރިވަރުންގެ އިތުރުން ވަކިވަކި މާއްދާތަކުން ދުނިޔޭގެ އެންމެ މަތީ ދަރަޖަ ހޯދާފައިވާ ދަރިވަރުންނަށާއި ރައީސުލްޖުމްހޫރިއްޔާ ދެއްވާ ހާއްސަ އެވޯޑް ލިބޭ ދަރިވަރުންނަށްވެސް މި ހަފްލާގައި އިނާމު ދިނުމަށް ވަނީ ހަމަޖެހިފައެވެ.

ދިރާގުގެ ޗީފް ކޮމާޝަލް އޮފިސަރ، އަލީ ރިޔާޒް ވިދާޅުވީ، ޒުވާނުން ބާރުވެރިކުރުވުމަކީ ދިރާގުގެ ސީ.އެސް.އާރު ޕްރޮގްރާމްގެ މައިގަނޑު އެއް އަސާސީ ދާއިރާ ކަމަށާއި އެގޮތުން މިނިސްޓްރީ އޮފް އެޑިއުކޭޝަނާއި ގުޅިގެން މަތީ ޘާނަވީ ނިންމާ އިމްތިޙާނުތަކުގެ މަތީ އަރުތަވެރީންގެ އިނާމު 2021-2022 ގެ ޕާރޓްނަރަކަށްވެ، މިއަދުގެ ޒުވާނުންގެ ކާމިޔާބީތައް ފާހަގަކުރުމަކީ އެބޭފުޅުންނަށް ލިބޭ ވަރަށް ބޮޑު ފަޚުރެއް ކަމަށެވެ.

މިނިސްޓްރީ އޮފް އެޑިއުކޭޝަންގެ ސީނިއަރ ޕޮލިސީ ޑިރެކްޓަރ، ނައުޝާދު އިބްރާހިމް ވަނީ ތަޢުލީމީ ދާއިރާއަށް އެހީތެރިކަން ފޯރުކޮށްދިނުމަށާއި މުޖުތަމައުގައި ޒުވާނުން ކުރިއެރުވުމަށް ދިރާގުން ދެއްވާ އެއްބާރުލުމާއި ހަރަކާތްތެރި ބައިވެރިވުމަށް ޝުކުރު އަދާކުރައްވާފައެވެ. އަދި މިފަދަ ހަރަކާތްތައް ބޭއްވުމުގައި އެކުންފުނިން އަބަދުވެސް ވެދެއްވާ އެހީތެރިކަންވެސް ނައުޝާދު ވަނީ ފާހަގަކުރައްވާފައެވެ.

މިއަހަރުގެ މަތީ ޘާނަވީ ނިންމާ އިމްތިޙާނުތަކުގެ މަތީ އަރުތަވެރީންގެ އިނާމު ދިނުމުގެ ހަފްލާ ބޭއްވުމަށް ހަމޖެހިފައިވަނީ 31 މެއި 2023 ގައި ދަރުބާރުގޭގައެވެ.

ޑިޖިޓަލް މުސްތަގުބަލުގައި ރާއްޖޭގެ ޒުވާނުން ކުރިއެރުވުމަށް ޓަކައި ޒުވާނުން ބާރުވެރިކުރުވާ އިވެންޓްތަކާއި ޕްރޮޖެކްޓްތަކަށް ދިރާގުން އަންނަނީ އެހީތެރިކަން ފޯރުކޮށްދެމުންނެވެ.