ޕޭ ކޮމިޝަންގައި ތާށިވެފައިހުރި ވަޒީފާގެ އޮނިގަނޑުތައް ފާސްކޮށްދެއްވުމަށް މޭޔަރު އާތިފް ގޮވާލައްވައިފި

ޕޭކަމިޝަންގައި ތާށިވެފައިހުރި ވަޒީފާގެ އޮނިގަނޑުތައް ފާސްކޮށް، ސިވިލް ސާވަންޓުންނަށް މިނިވަން ތާހިރު ދިރިއުޅުމެއް އުޅެވޭނޭފަދަ އުޖޫރައެއް ކަށަވަރުކޮށްދިނުމަށް ކުޅުދުއްފުށީ މޭޔަރު މުހައްމަދު އާތިފް ގޮވާލައްވައިފި އެވެ.

"ގައުމެއްގެ ތަރައްގީއާއި ތަމައްދުން އާރާސްތުކުރުމުގެ މައިބަދައަކީ އެ ގައުމެއްގެ މަސައްކަތްތެރިން. ގައުމުގެ ކުރިމަގު ބައްޓަންކުރުމުގައި އެންމެ ބޮޑު ދައުރެއް އަދާކުރާ ފަރާތްތަކަކީ ގައުމުގެ މަސައްކަތްތެރިން." މިއަދު ފާހަގަކުރާ ބައިނަލްއަގްވާމީ މަސައްކަތްތެރިންގެ ދުވަހާ ގުޅުވައިގެން މޭޔަރު އާތިފް ވިދާޅުވި އެވެ.

މޭޔަރު އާތިފް ކުރެއްވި ޕޯސްޓެއްގައި ވިދާޅުވީ، ފާއިތުވި 5 އަހަރުތެރޭގައި މަސައްކަތްތެެރިންނާއި ގުޅުންހުރި ގިނަ އިސްލާހުތަކެއް ގާނޫނަށް ގެނެސްދެއްވި ކަމަށާއި އެހެންނަމަވެސް އަދިވެސް އިތުރު ގިނަ ހެޔޮބަދަލުތައް ދިވެހި މަސައްކަތްތެރިންނަށް ފަހިކޮށްދޭން ޖެހޭކަން މޭޔަރު ފާހަގަކުރެއްވި އެވެ. އަދި އަމިއްލަ މަސައްކަތްތައް ކުރާފަރާތްތަކަށް މިހާރު ގެއްލިފައިވާ ގިނަ ހައްގުތަކެއް ކަށަވަރުވާން ޖެހޭކަމަށް މޭޔަރު ވިދާޅުވި އެވެ.

އަދި ހަދާފައިހުރި ގާނޫނުތައް ރަނގަޅަށް ތަންފީޒު ކުރުމަށް މޭޔަރު އާތިފް އެދިވަޑައިގެންނެވި އެވެ.

ފާއިތުވި 5 އަހަރުތެރޭގައި މަސައްކަތްތެެރިންނާއި ގުޅުންހުރި ގިނަ އިސްލާހުތަކެއް ގާނޫނަށް ގެނެސްދެއްވިކަން މޭޔަރު ފާހަގަކުރެއްވި އެވެ. އެގޮތުން ވަޒީފާއާބެހޭ ޤާނޫނަށް ގެނެވުނު 6 ވަނަ އިސްލާހާއެކު ވަޒީފާގެ އެއްބަސްވުން ހަދަން ލާޒިމްކުރުމާއި، ފަތުރުވެރިކަމުގެ ސިނާއަތުގައި ފޯރުކޮށްދޭ ކޮންމެ ހިދުމަތަކުން، %10 އަށްވުރެ މަދުނޫން އަދަދަކުން "ސަރވިސްޗާޖް" ނެގުމަށް ލާޒިމުކުރުމާއެކު މުވައްޒަފުންނަށް ލިބޭނެކަން ގާނޫނުން ކަށަވަރުކުރި އެވެ.

އަދި އެއް ޤައުމަކުން އެންމެ ގިނައިން ބިދޭސީ މަސައްކަތްތެރިން ގެނެވޭނެ އަދަދު ކަނޑައެޅުމާއި، ދިވެހިން ތަމްރީނުކުރުމާއި، ދިވެހި މަސައްކަތްތެރިންނަށް އިސްކަންދިނުމާއި، މުވައްޒަފުން ދިރިއުޅުމަށް ހަމަޖައްސާ ތަންތަނުގެ މިންގަނޑާއި ބެހޭ މާއްދާތަކާއެކު މުވައްޒަފުންގެ ގިނަ ހައްގުތަކެއް ކަށަވަރު ކޮށްދިނެވެ. އަދި ހަމަ އެއާއެކު އެންމެ ކުޑަ އުޖޫރަ ގާނޫނުން ކަށަވަރުކޮށްދެއްވިކަން މޭޔަރު ވިދާޅުވި އެވެ.

މީގެ އިތުރުން ސިއްހީ އަދި ތައުލީމީ ދާއިރާ ފަދަ މުހިންމު ދާއިރާތަކުގައި މަސައްކަތްކުރާ މުވައްޒަފުންގެ މުސާރައަށް ހެޔޮ ބަދަލުތަކެއް ގެނެސް، ސަރުކާރު މުވައްޒަފުން ވިހެއުމާއި ގުޅިގެން ލިބޭ ޗުއްޓީވެސް އެކަށީގެންވާ މުއްދަތަކަށް ހެދި އެވެ. އަދި ހުރިހާ ދާއިރާތަކެއް ހިމެނޭހެން ޕޭ ހާމަނައިޒޭޝަންގެ މަސައްކަތްތަކެއް ފެއްޓެވި އެވެ.

މޭޔަރު ވިދާޅުވީ ރާއްޖޭގެ ހުރިހާ ރަށެއްގައި ފަތުރުވެރިކަންފަދަ އިގްތިސޯދީ މަސައްކަތްތަކަށް ބޭނުންވާނޭ އެންމެ އަސާސީ ހިދުމަތްތައް ގާއިމުކުރުމުގެ މަސައްކަތްވެސް މިދިޔަ ފަސް އަހަރުތެރޭގައި ކުރިކަމަށެވެ.

ގަވައިދާއި ހިލާފަށް އުޅޭ ބިދޭސީ މަސައްކަތްތެރިންގެ މައްސަލަ ހައްލުވާން އެބަޖެހޭ ކަމަށާއި އުފެއްދުންތެރި އީޖާދީ މަސައްކަތްތެރިންނަށް ކުރިއަށްދެވޭނޭ ފަހި ފުރުސަތުތައް ތަނަވަސްވާން އެބަ ޖެހޭ ކަމަށެވެ.

"ޓެކްނޮލޮޖީއަށް އަންނަ ބަދަލުތަކާއެކު ރާއްޖޭގެ މަސައްކަތްތެރިންނަށް އެއާއި ފައިހަމަކުރެވޭނޭ ގޮތް ހޯއްދަވައި ދެއްވަން އެބަޖެހެއެވެ. ދިވެހި އިޤްތިސާދު ސިންތަފާތުކޮށް ރާއްޖޭގެ ހުރިހާ ސަރަހައްދަކަށް އިގްތިސާދީ ނަފާވެރިކަން ބެހިގެންދާނޭގޮތަށް ސަރުކާރުގެ ސިޔާސަތުތައް ބައްޓަން ކުރާން އެބަޖެހެއެވެ." މޭޔަރު އާތިފް ވިދާޅުވި އެވެ.