ހދ އަތޮޅުގައި ފަތުރުވެރިކަން ތަރައްގީކޮށް ކުރިއެރުވުމަށް ކޮމެޓީއެއް އެކުލަވާލައިފި

ހދ އަތޮޅުގައި ފަތުރުވެރިކަން ތަރައްގީކޮށް ކުރިއެރުވުމަށް ކޮމެޓީއެއް އެކުލަވާލައިފި އެވެ. މި ކޮމެޓީގެ ނަމަކީ 'ހދ އަތޮޅު ޓޫރިޒަމް ކޮމެޓީ' އެވެ.

ގާނޫނުން ބާރުލިބިގެން އުފައްދި މި ކޮމެޓީގެ ފުރަތަމަ ބައްދަލުވުން މިދިޔަ ބުރާސްފަތި ދުވަހު ހަނިމާދޫގަ އެވެ. މި ބައްދަލުވުމުގައި ކޮމެޓީގެ މަގާމުތަކަށް މީހުން އިންތިހާބުކުރުން ކުރިއަށްދިޔަ އެވެ.

އެގޮތުން ކޮމެޓީގެ ޗެއާޕަސަންގެ މަގާމަށް މަކުނުދޫ ކައުންސިލްގެ ރައީސް އައުޒަމް އާދަމް އިންތިހާބުކުރެއްވިއިރު ވައިސް ޗެއާޕާސަންގެ މަގާމަށް އިންތިހާބުކުރީ ހަނިމާދޫ ކައުންސިލްގެ ރައީސް އަބުދުއްސައްތާރު ހަސަނެވެ.

ކޮމެޓީގެ ބައްދަލުވުމުގައި ކުޅުދުއްފުށީ މޭޔަރު މުހައްމަދު އާތިފް އާއި ކުރިނބީ ކައުންސިލްގެ ރައީސް އަބުދުﷲ އަސްލަމް އަދި ހދ އަތޮޅު ކައުންސިލްގެ ނައިބު ރައީސް މުހައްމަދު ވަހީދު އާއި ނޮޅިވަރަންފަރު ކައުންސިލްގެ ރައީސް އަބުދުﷲ ނަދީމް ބައިވެރިވެވަޑައިގެންނެވި އެވެ.

ކައުންސިލްގެ މީޑިއާ އޮފިސަރު އަބުދުﷲ އަސްލަމް މީޑިއާތަކަށް ފޮނުވި މެސެޖެއްގައި ވިދާޅުވީ، މި ބައްދަލުވުމުގައި އަތޮޅުގެ ފަތުރުވެރިކަމާ ގުޅޭ ގޮތުން ފުޅާ ދާއިރާއެއްގައި މަޝްވަރާކުރެވި ހިޔާލު ބަދަލުކުރެވުނު ކަމަށެވެ.

އެގޮތުން ދެމެހެއްޓެނިވި އީކޯ-ޓޫރިޒަމް، ސަގާފީ ތަރިކަ ރައްކާތެރިކުރުން އަދި އާ ވަޒީފާގެ ފުރުސަތުތައް އުފެއްދުމާއި ފަތުރުވެރިންގެ ޝައުގުވެރިކަމަށް އަމާޒުކޮށްގެން އުމްރާނީ ތަރައްގީއަށް އިސްކަންދޭ މަޝްރޫއުތަކާ ބެހޭގޮތުން ކަމަށެވެ.

މީގެ އިތުރުން ދުރު ރާސްތާގެ ސްޓްރެޓެޖީގެ ބައެއްގެ ގޮތުން، މި ލަނޑުދަނޑިތައް ހާސިލުކުރުމަށް ރޭވުމާއި ތަންފީޒުކުރުމުގައި އިރުޝާދު ދިނުމަށްޓަކާ ޓޫރިޒަމް ކޮންސަލްޓަންޓެއް ހޯދުމަށް ކޮމިޓީން ނިންމި އެވެ. އަދި ރަށުގެ މައުލޫމާތާއި ތަޖުރިބާކާރުންގެ އިރުޝާދު އެއްކޮށްލައިގެން، ހދ. އަތޮޅަކީ ދިވެހި ސަގާފަތް ފާހަގަކުރުމާއެކު އިގްތިސޯދީ ކުރިއެރުން ގެނެސްދޭ، ކުރިއަރާފައިވާ މަންޒިލަކަށް ހެދުންކަމުގައި އަސްލަމްގެ މެސެޖްގައި ލިޔުއްވާފައިވެ އެވެ.