މެޕްސް ކޮލެޖުން ދުނިޔެ ގަބޫލު ކުރާ ޔޫކޭގެ ޗާޓަޑް މެނޭޖްމަންޓް އިންސްޓިޓިއުޓްގެ ސަނަދުތައް ތައާރަފްކޮށްފި

ޔޫކޭގެ ޗާޓަޑް މެނޭޖްމަންޓް އިންސްޓިޓިއުޓް (ސީއެމްއައި)ގެ ސަނަދުތައް މެޕްސް ކޮލެޖުން ފުރަތަމަ ފަހަރަށް ރާއްޖެއަށް ތައާރަފްކޮށްފި އެވެ.

މި ސަނަދުތައް ތައާރަފް ކުރުމަށްޓަކައި މެޕްސް ކޮލެޖުގައި އިއްޔެ ބޭއްވި ޚާއްޞަ ޙަފްލާގައި ވާހަކަ ދައްކަވަމުން ކޮލެޖުގެ ވައިސް ރެކްޓަރ-އެޑްމިނިސްޓްރޭޓިވް އެފެއަރސް، އައިމިނަތު ޢަބްދުލް ވާހިދު ވިދާޅުވި ގޮތުގައި މިއީ އިންޓަނޭޝަނަލް ލެވެލްގެ ސެޓްފިކެޓެއް ހާސިލުކުރަން ބޭނުންވާ ފަރާތްތަކަށް ލިބިގެންދާނެ ވަރަށް އަގުހުރި ފުރުސަތެއް ކަމަށެވެ.

ޗާޓަޑް މެނޭޖްމަންޓް އިންސްޓިޓިއުޓަކީ، 1947 ގައި އުފެދުނު މެނޭޖްމަންޓް ދިރާސާތަކަށް ޚާއްޞަ ހަމައެކަނި ޗާޓަޑް އިންސްޓިޓިއުޓެވެ. ހަމައެއާ އެކު މި އިންސްޓިޓިއުޓަކީ ރޯޔަލް ޗާޓަ ފޯ މެނޭޖްމަންޓްގެ ޝަރަފު ލިބިފައިވާ ހަމައެކަނި އިންސްޓިޓިއުޓްވެސްމެއެވެ. އިނގިރޭސިވިލާތުގައި މެނޭޖްމަންޓްގެ ޕްރޮފެޝަނަލް މިންގަނޑުތައް ބަލަހައްޓާ ތަރައްޤީކޮށް އެއް ގިންތިއެއްގައި ފެންވަރު ހިފެހެއްޓުމަށް މި އިންސްޓިޓިއުޓްއިން ކޮންމެ އަހަރަކު ވެސް ވަރަށް ގިނަ މަސައްކަތްތައް ކުރެއެވެ.

މި މިންގަނޑުތަކަކީ ހުނަރުވެރި ގާބިލު މެނޭޖަރަކަށް ވުމަށް ބޭނުންވާ ކޮންމެ މީހަކަށް ވެސް އެންމެ މުހިއްމު އެއް އަސާސް ކަމަށް ވާއިރު ސީއެމްއައިއިން ފޯރުކޮށްދޭ ސަނަދުތަކަކީ ދަރިވަރުންނަށް ވަރަށް މުހިއްމު ސަނަދަކަށް ވާނެ ކަމަށް މެޕްސް ކޮލެޖުން މައުލޫމާތު ދެއްވައެވެ.

އަލަށް ތައާރަފް ކުރެވުނު ސީއެމްއައިގެ ސަނަދުތަކާ އެކު މެޕްސް ކޮލެޖުން ބެޗެލަރސް ޑިގްރީ ފުރިހަމަ ކުރާ ދަރިވަރުންނަށް، ބެޗެލަރސް ޑިގްރީގެ ސަނަދުގެ އިތުރުން ސީއެމްއައި ލެވެލް 5 ސެޓްފިކެޓް އިން މެނޭޖްމަންޓް އެންޑް ލީޑަރޝިޕް ސަނަދު ލިބޭނެއެވެ. މި ސަނަދާ އެކު މެޕްސް ކޮލެޖުން ބެޗެލަރސް ޑިގްރީ ފުރިހަމަ ކުރާ ދަރިވަރުންގެ މެނޭޖްމަންޓް އަދި ލީޑަރޝިޕް ދާއިރާގެ ހުނަރު ބައިނަލްއަގުވާމީ ފެންވަރުގައި ފާހަގަ ކުރެވި ދަރިވަރުންނަށް އެ ދާއިރާތަކުން ގިނަ ފުރުސަތުތައް ލިބުމަށް މަގުފަހިވެގެންދާނެ ކަމަށް މެޕްސް ކޮލެޖުން ވަނީ ބުނެފައެވެ.

މެޕްސް ކޮލެޖުގައި ތަޢުލީމު ޙާޞިލްކުރާ ދަރިވަރުންގެ އިތުރުން ހަމައެކަނި މި ސަނަދު ޙާޞިލްކުރަން ބޭނުންވާ އާންމު ފަރާތްތަކަށްވެސް މެނޭޖްމަންޓް ތަމްރީނު ޕްރޮގްރާމް ތަކުގައި ބައިވެރިވެ ސީއެމްއައި ލެވެލް 5 އެވޯޑު އަދި ސީއެމްއައި ލެވެލް 5 ސެޓްފިކެޓް އިން މެނޭޖްމެންޓް އެންޑް ލީޑަރޝިޕް ޙާޞިލުކުރުމުގެ ފުރުޞަތު މިހާރު ލިބޭނެ ކަމަށް މެޕްސް ކޮލެޖުން މައުލޫމާތު ދެއްވައެވެ.

މި ޕާޓްނަރޝިޕްގެ ދަށުން، ސީއެމްއައިގެ ސަނަދުތައް ޙާޞިލުކުރާ ފަރާތްތަކަށް، އެ އިންސްޓިޓިއުޓްގެ ގިނަ ވަޞީލަތްތައް ބޭނުން ކުރުމުގެ ފުރުޞަތު ލިބޭނެއެވެ. އަދި މި ފަރާތްތަކަށް، ކިޔެވުމުގެ މުއްދަތުގެ ތެރޭގައި 180،000 މެމްބަރުން ހިމެނޭ ދުނިޔޭގެ ކޮމިއުނިޓީއެއް ކަމުގައިވާ ސީއެމްއައި ޕްރޮފެޝަނަލް ބޮޑީގެ މެމްބަރުންނަށް ވެސް ވުމުގެ ފުރުޞަތު ލިބިގެންދާނެއެވެ.

ޕްރޮފެޝަނަލް ޖަމްޢިއްޔާ ޗާޓަޑް މެނޭޖްމަންޓް އިންސްޓިޓިއުޓްއާ އެކު ގާއިމު ކުރެވުނު އެއްބަސްވުމާ އެކު މެޕްސް ކޮލެޖުން ވަނީ ބޭރު ދުނިޔޭގެ މަޝްހޫރު ޔުނިވަރސިޓީތައް ކަމަށްވާ ޔުނިވަރސިޓީ އޮފް ލަންޑަން، ޑީކިން ޔުނިވަރސިޓީ، ކްރެންފީލްޑް ޔުނިވަރސިޓީ، ޔޯކް ޔުނިވަރސިޓީ އަދި ޔުނިވަރސިޓީ އޮފް ލީޑްސްފަދަ ސީއެމްއައި ޑުއަލް އެކްރެޑިޓޭޝަން ސަނަދު ދަރިވަރުންނަށް ފޯރުކޮށްދޭ ފަރާތްތަކުގެ ޝަރަފާ އެކު ތާރީހުން ޖާގަ ހޯދާފައެވެ.

ސީއެމްއައިގެ ތަމްރީނު ޕްރޮގްރާމްތަކުގައި ބައިވެރިވުމަށް ޝައުޤުވެރިވާ ފަރާތްތަކަށް މެޕްސް ކޮލެޖުގެ ވެބްސައިޓު މެދުވެރިކޮށް ރެޖިސްޓަރ ވުމުގެ ފުރުސަތު މިހާރު ހުޅުވާލެވިފައިވާ ކަމަށް އެ ކޮލެޖުން މައުލޫމާތު ދެއްވައެވެ. މެޕްސް ކޮލެޖުން ފޯރުކޮށްދޭ ޗާޓަޑް މެނޭޖްމަންޓް އިންސްޓިޓިއުޓްގެ ސަނަދުތަކާ ގުޅޭގޮތުން އިތުރު މައުލޫމާތު ހޯދަން ބޭނުންވާ ފަރާތްތަކުން މެޕްސް ކޮލެޖުގެ ވެބްސައިޓް www.maps.edu.mv މެދުވެރިކޮށް މައުލޫމާތު ހޯދޭނެއެވެ. އަދި މެޕްސްކޮލެޖުގެ ނަމްބަރު 3314621އަށް ގުޅާލައިގެން ވެސް މި ސަނަދުތަކާ ބެހޭ މައުލޫމާތު ހޯދޭނެއެވެ.