ރައީސް މުއިއްޒުގެ ތަހުނިޔާ އދ. ގެ އާންމު މަޖިލީހުގެ އާ ރައީސަށް

އދ.ގެ އާންމު މަޖިލީހުގެ 81 ވަނަ ސެޝަންގެ ރައީސްގެ މަގާމަށް ބަންގްލަދޭޝްގެ ފޮރިން މިނިސްޓަރު ޑރ. ހަލީލުއް ރަހްމާން އިންތިހާބު ވެވަޑައިގަތުމާއި ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަރުހަބާ ވިދާޅުވެއްޖެ އެވެ.

އެކްސްގައި ރައީސް ކުރެއްވި ޕޯސްޓެއްގައި ވިދާޅުވީ، މިއީ މުޅި ދެކުނު އޭޝިއާ ސަރަޙައްދަށާއި ބަންގްލަދޭޝްގެ ރައްޔިތުންނަށް ލިބިގެންދިޔަ ވަރަށް ބޮޑު ޝަރަފެއްކަން ފާހަގަކަމަށެވެ. އަދި ޑރ. ހަލީލުއްރަޙްމާންގެ ޒައާމަތުގެ ދަށުން، އދ. ގެ އާންމު މަޖިލީހަކީ ބައިނަލްއަޤްވާމީ މުޖުތަމައުގެ މެންބަރު ޤައުމުތަކަށް ނުހަނު މަންފާކުރަނިވި މުހިންމު ޕްލެޓްފޯމަކަށް ވެގެންދާނެކަމުގެ ފުރިހަމަ ޔަޤީންކަން އޮތްކަމަށް ވެސް އެމަނިކުފާނު ވިދާޅުވިއެވެ.

Warm congratulations to His Excellency Dr Khalilur Rahman, Foreign Minister of Bangladesh, on his election as the President of the 81st session of the #UNGA. I wish you every success in this important role.

I am confident that under your able leadership, the General Assembly…

— Dr Mohamed Muizzu (@MMuizzu) June 2, 2026

އދ. ގެ އާންމު މަޖިލީހުގެ 81 ވަނަ ސެޝަންގެ ރައީސްގެ މަގާމަށް ބަންގްލަދޭޝްގެ ހާރިޖީ ވަޒީރު އިންތިހާބުވުމާ ގުޅިގެން ރާއްޖޭގެ ހާރިޖީ ވަޒީރު އިރުތިޝާމް އާދަމްވެސް ވަނީ ތަހުނިޔާ ވިދާޅުވެފައެވެ.

އިރުތިޝާމް ވިދާޅުވީ، މިއީ ބަންގްލަދޭޝަށް ފަހުރުވެރި ވަގުތުކޮޅެއް ކަމަށާއި، ޑރ. ޚަލީލުއް ރަޙްމާނަށް ލިބިވަޑައިގެންފައިވާ ތަޖުރިބާ އާއި އެހެން ގައުމުތަކާ ގުޅިގެން މަސައްކަތް ކުރެއްވުމުގެ ދެގޮތެއްނުވާ ރޫޙާއެކު އދ. ގެ އާންމު މަޖިލީހުގައި ޚިދުމަތް ކުރައްވާނެ ކަމަށް ޔަގީން ކުރައްވާ ކަމަށެވެ. އަދި އދ. އާންމު މަޖިލިހުގައި ހާސިލް ކުރުމަށް ހުރި ލަނޑުދަނޑިތައް ހާސިލް ކުރުމުގައި ރާއްޖެއިން އަބަދުވެސް އެއްބާރުލުން ދެއްވާނެ ކަމުގެ ޔަގީންކަން އިރުތިޝާމް ދެއްވިއެވެ.

އދ. ގެ އާންމު މަޖިލީހުގެ 81 ވަނަ ސެޝަން ފެށުމަށް ހަމަޖެހިފައިވަނީ، އަންނަ ސެޕްޓެމްބަރު ގައެވެ. އދ.ގެ އާންމު މަޖިލީހަކީ، 193 މެމްބަރު ޤައުމުގެ މައްޗަށް އެކުލެވޭ އާންމު މަޖިލީހެވެ.