"އެނާޖީ ނެތުމުން ވަކިވަނީ": ސިޓީގެ ކުޅުންތެރިންނަށް ގާޑިއޯލާ ދިން ހާއްސަ މެސެޖު

މެންޗެސްޓާ ސިޓީގެ ކާމިޔާބު ކޯޗު ޕެޕް ގާޑިއޯލާ ކްލަބުގެ ފަހު މެޗުގެ ކުރިން ކުޅުންތެރިންނާ މުހާތަބުކޮށް، ސިޓީ ދޫކޮށްލާނެކަން އިއުލާން ކުރި އަސަރުގަދަ ތަގުރީރުގެ ތަފްސީލުތައް އާންމުވެއްޖެ އެވެ.

އިޓަލީގެ ނޫސްވެރިޔާ ފަބްރިޒިއޯ ރޮމާނޯ އާންމުކޮށްފައިވާ މައުލޫމާތުތަކަށް ބަލާއިރު، ކުޅުންތެރިންނާ ވާހަކަދައްކަމުން ގާޑިއޯލާ ބުނީ ސެލްހާސްޓް ޕާކާއި، އެންފީލްޑް، އެފްއޭ ކަޕްގައި ދަށް ލީގުތަކުގެ ޓީމުތަކާ ދެކޮޅަށް ކުޅޭ މެޗުތައް އަދި ރިއާލް މެޑްރިޑާ ދެކޮޅަށް ކުޅޭ ބޮޑެތި މެޗުތައް ފަދަ އުނދަގޫ ގޮންޖެހުންތަކާ ކުރިމަތިލާއިރު، ޓީމު ގޮވައިގެން ނުކުތުމަށް ބޭނުންވަނީ ބޮޑު ހަކަތައެއް ކަމަށެވެ.

"އަހަރެން ވަކިވާން ނިންމި ސަބަބަކީ ވަރަށް އާދައިގެ ސަބަބެއް. ސެލްހާސްޓް ޕާކް، އެންފީލްޑް، އެފްއޭ ކަޕްގައި ދަށް ލީގުތަކުގެ މެޗުތައް، މެޑްރިޑް، މެޑްރިޑް، މެޑްރިޑް، އަދި އަހަރެމެންގެ މި ތިބި މޮޅު ކުޅުންތެރިންނާއެކު ކުރިއަށްދާން ބޭނުންވަނީ އިތުރު ހަކަތަ. ނަމަވެސް، އަހަރެންގެ ހިތުގެ އަޑިން ގަބޫލުކުރަން މިހާރު އަހަރެންގެ ކިބައިގައި އެ ހަކަތަ ނެތްކަން،" ގާޑިއޯލާ ކުޅުންތެރިންނަށް ބުނެފައިވެ އެވެ.

ގާޑިއޯލާ އިތުރަށް ބުނެފައިވަނީ އޭނާ ކްލަބް ދޫކޮށްދަނީ ކުޅުންތެރިންނާއި ސަޕޯޓަރުންނަށް އޮތް ނުހަނު ބޮޑު ޝުކުރުވެރިކަމާއެކު އުފަލުން ހުރެގެން ކަމަށެވެ. އަދި އޭނާ ވަކިވާ ހަބަރު އާންމުންނަށް އެނގުމުގެ ކުރިން، ކުޅުންތެރިންނަށް އެކަން އެނގުމަކީ ކުޅުންތެރިންނަށް ހައްގު މިންވަރު ކަމަށްވެސް އޭނާ ފާހަގަކުރި އެވެ.

މި ތަގުރީރުގެ ތަފްސީލުތައް ތިލަވެގެން ގޮސްފައިވަނީ އެމަޒޯންއިން ނެރުނު މުނިފޫހިފިލުވުމުގެ ހާއްސަ ވީޑިއޯ ސީރީޒެއް މެދުވެރިކޮށެވެ. މި ސީރީޒްގައި ގާޑިއޯލާ ސިޓީގައި ހޭދަކުރި ފަހު ދުވަސްތަކުގެ އެތެރޭގެ މުހިންމު ހަގީގަތްތަކެއް ވަނީ ހާމަކޮށްފަ އެވެ.

އެތައް އަހަރެއް ވަންދެން ސިޓީއަށް ގިނަ ކާމިޔާބީތަކެއް ހޯދައިދިން ކޯޗު، ކުޅުންތެރިންގެ ކިބައިން އެންމެ ފަހު ކަމަކަށް އެދުނީ އެކަކު އަނެކަކަށް ސަލާމްކޮށް، ބައްދާލުމަށެވެ. "މިއީ އަހަރެންގެ ބަސްތަކަށްވުރެ މުހިންމު ކަމެއް. އަހަރެން ބޭނުންވަނީ ބައްދާލާ ސަލާމްކޮށްލަން،" ގާޑިއޯލާ ބުނެފައިވެ އެވެ.

ގާޑިއޯލާ މެންޗެސްޓާ ސިޓީގައި ހޭދަކުރި ދިގު މުއްދަތުގެ ތެރޭގައި އޭނާ ވަނީ ގިނަ ތަށިތަކެއް ކްލަބަށް ހޯދައިދީ، އިނގިރޭސި ފުޓްބޯޅައިގެ ތާރީހުގައިވެސް އެންމެ ކާމިޔާބު އަދި ނުފޫޒުގަދަ އެއް ކޯޗުގެ ގޮތުގައި ނަން ފަވާލާފަ އެވެ.