އީއެސްޕީއެންގެ ރޭންކިންގްސް: އެމްބާޕޭ އަދި ހާލަންޑް ފަހަތަށް ޖައްސާލުމަށްފަހު އެފްސީ100 ލިސްޓުގެ އެއްވަނަ ކޭން ހޯދައިފި

މަޝްހޫރު ކުޅިވަރު މީޑިއާ އީއެސްޕީއެންއިން ނެރުނު 2026 ވަނަ އަހަރުގެ "އެފްސީ100" އަހަރީ ރޭންކިންގްގައި، ދުނިޔޭގެ އެންމެ މޮޅު ސެންޓަރ ފޯވާޑްގެ މާގާމު އިނގިރޭސި ގައުމީ ޓީމާއި ބަޔާން މިއުނިކްގެ ކެޕްޓަން ހެރީ ކޭން ހޯދައިފި އެވެ.

ކުޅިވަރުގެ އިތުބާރުހުރި ނޫސްވެރިޔާ ފަބްރިޒިއޯ ރޮމާނޯ އާންމުކޮށްފައިވާ މައުލޫމާތުތަކަށް ބަލާއިރު، ކޭން މި މަގާމު ހޯދާފައިވަނީ މިވަގުތު ދުނިޔޭގައި ތިބި އެންމެ ވަރުގަދަ އަދި ނުރައްކާތެރި ފޯވާޑުން ކަމަށްވާ ކީލިއަން އެމްބާޕޭ އާއި އާލިންގް ހާލަންޑް ފަހަތަށް ޖައްސާލުމަށްފަހު އެވެ.

އީއެސްޕީއެންގެ މި ލިސްޓުގެ ދެވަނައިގައި ރިއާލް މެޑްރިޑަށް ކުޅެމުންދާ ފްރާންސްގެ ތަރި ކީލިއަން އެމްބާޕޭ ހިމެނޭއިރު، ތިންވަނަ ލިބިފައިވަނީ މެންޗެސްޓާ ސިޓީގެ ނޯވޭ ފޯވާޑް އާލިންގް ހާލަންޑަށެވެ. އަދި ޕެރިސް ސެއިންޓް ޖާމަންގެ އުސްމާން ދެ ޑެމްބެލޭއަށް ލިބުނީ ހަތަރުވަނަ އެވެ.

މި ރޭންކިންގްގެ ގަދަ 10 ގައި ދެން ހިމެނޭ ކުޅުންތެރިންގެ ތެރޭގައި އެތުލެޓިކޯ މެޑްރިޑްގެ ހޫލިއަން އަލްވަރޭޒް (5 ވަނަ)، އިންޓަ މިލާންގެ ލައުތާރޯ މާޓިނޭޒް (6 ވަނަ)، އަދި އާސެނަލްގެ ކައި ހަވާޓްޒް (7 ވަނަ) ހިމެނެއެވެ.

ލިސްޓުގެ 8 ވަނައިގައި ޗެލްސީގެ ޖޮއާއޯ ޕެޑްރޯ ހިމެނޭއިރު، 9 ވަނަ ލިބިފައިވަނީ ގަލަތަސަރާއިގެ ވިކްޓާ އޮސިމްހެން އަށެވެ. އަދި ގަދަ ދިހައެއް ނިންމާލީ ލިވަޕޫލްގެ ހޫގޯ އެކިޓިކޭ އެވެ.

ނިމިދިޔަ ސީޒަނުގައި ބަޔާން މިއުނިކާއި އިނގިރޭސި ގައުމީ ޓީމަށް ކުޅުނު މެޗުތަކުގައި ކޭން ވަނީ ގިނަ ލަނޑުތަކެއް ޖަހައި، ޓީމުގެ ކުރީގައި އާދަޔާ ހިލާފު މޮޅު ކުޅުމެއް ދައްކާފަ އެވެ. އޭނާގެ މި ނިންމުންތަކާއި، ކުޅުންތެރިންނަށް ފުރުސަތު ތަނަވަސްކޮށްދިނުމުގެ ގާބިލުކަމަށް ކުޅިވަރު ތަހުލީލުކުރާ ފަރާތްތަކުން ވަނީ ވަރަށް ބޮޑަށް ތައުރީފުކޮށްފަ އެވެ.

"ކޭންއަކީ މިހާރު ދުނިޔޭގެ ފުޓްބޯޅައިގައި ހުރި އެންމެ ފުރިހަމަ އަދި ނުރައްކާތެރި ނަންބަރު 9،" އީއެސްޕީއެންގެ ތަހުލީލީ ޓީމުން ކޭންގެ ކުޅުމަށް އިޝާރާތްކޮށް ބުނެފައިވެ އެވެ. މި ރޭންކިންގް އާންމުވުމާއެކު ސަޕޯޓަރުންގެ މެދުގައި ވަނީ ބޮޑު ބަހުސެއް އުފެދިފަ އެވެ.