އިންޖިނިއަރިންގެ އެކި ތަހުލީލުކުރެވޭ މަތީފެންވަރުގެ އިމާރާތެއް އަޅަނީ

ރާއްޖޭގެ އުމްރާނީ އަދި ފަންނީ ތަރައްގީގެ އާ ހަރުފަތަކަށް ގެންދިއުމުގެ މަގުސަދުގައި، އިންޖިނިއަރިންގެ ތަފާތު ދާއިރާތަކަށް ހާއްސަކޮށްގެން އެންމެ މަތީ ފެންވަރުގެ ލެބޯޓަރީއެއް ބިނާކުރައްވަން ނިންމަވާފައިވާކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހާމަކުރައްވައިފިއެވެ.

ގައުމީ އިންޖިނޭރުންގެ ދުވަހުގެ މުނާސަބަތުގައި މިއަދު ރައީސުލްޖުމްހޫރިއްޔާ ދެއްވި ހިތާބުގައި، ސަރުކާރުގެ ބަޖެޓަށް ބާރުބޮޑުނުވާނެހެން، ދެމެހެއްޓެނިވި އުސޫލަކުން ފަންޑު ހޯދައިގެން ކުރިއަށްގެންދާ މި މަޝްރޫއުގެ ދަށުން ގާއިމުކުރާ އިމާރާތުގައި، ސިވިލް، މެކޭނިކަލް އަދި އިލެކްޓްރިކަލް އިންޖިނިއަރިންގެ އިތުރުން ސޮފްޓްވެއާ އާއި ރޮބޮޓިކްސް އަދި އެއާކްރާފްޓް އިންޖިނިއަރިން ފަދަ ޒަމާނީ ރޮނގުތަކުން ތަހުލީލުތައް ކުރެވޭނެ އިންތިޒާމު ހަމަޖެހިގެންދާނެއެވެ. ރައީސް ފާހަގަކުރެއްވި ގޮތުގައި މިކަމަށް ބޭނުންވާ ފަންނީ ތައްޔާރީތަކާއި އިންވެސްޓްމަންޓް ހޯދުމުގެ މަސައްކަތް މިހާރު ވަނީ ފެށިފައެވެ.

އިންޖިނިއަރިންގގެ އެކިއެކި ދާއިރާތަކުން ރިސަރޗްތައް ކުރެވޭ، ސްޓޭޓް އޮފް ދި އަރޓް ލެބޯޓްރީ ފެސިލިޓީއެއް ހިމެނޭގޮތަށް، ޢިމާރާތެއް ބިނާކުރުމަށް ސަރުކާރުން ނިންމާފައިވާކަމަށް ރައީސުލްޖުމްހޫރިއްޔާ ވިދާޅުވެއްޖެ. މި ޢިމާރާތް ބިނާކުރައްވައި ހިންގުމުގެ ހުރިހާ އިންތިޒާމެއް ހަމަޖައްސަވާނީ… pic.twitter.com/jBJikAifZf

— The President's Office (@presidencymv) August 30, 2026

ރައީސް ފާހަގަކުރެއްވި ގޮތުގައި، އިންޖިނިއަރިންގެ އެކި ދާއިރާތަކުގައި މަސައްކަތްކުރާ ފަރާތްތަކުން އަދާކުރަނީ ވަރަށް ބުރަ އަދި މުހިންމު މަސްއޫލިއްޔަތެކެވެ. އަދި ރާއްޖެއަށް މި ދާއިރާތަކުން ގިނަ އަދަދަކަށް ދިވެހި ޒުވާނުން ބޭނުންވާކަން ފާހަގަކުރައްވައި، މަތީ ތަޢުލީމު ހާސިލްކުރާ ދިވެހިން އިތުރުކުރުމަށް ސަރުކާރުގެ އެހީތެރިކަން ފޯރުކޮށްދިނުމަކީ މުހިންމު ކަމެއް ކަމުގައި ރައީސް ވިދާޅުވިއެވެ.

"މިކަމަށް ޓަކައި ބޭނުންވާ އިންވެސްޓްމަންޓުގެ މަސައްކަތް ސަރުކާރުން ކުރިޔަށްގެންދާނެ. މިކަން ކުރިޔަށްގެންދާނީ ސަރުކާރުގެ ބަޖެޓަށް ބުރަނުވާނެ ގޮތަކަށް ދެމެހެއްޓެނިވި ގޮތެއްގައި. އިރާދުކުރެއްވީއްޔާ މިކަންވެގެންދާނީ ދިވެހިރާއްޖޭގެ އެކިއެކި އިންޖިނިއަރިންގެ ދާއިރާތަކުން ކިޔަވަން ބޭނުންވާ ކުދިން އިތުރުވެގެން ދިއުމަށާއި އަދި ރާއްޖެއަކީ އިންޖިނިއަރިންގެ އެކި ފީލްޑުތަކުގައި ތަރައްޤީވެގެން މަތިވެދާނުގައި ވަރަށް މަތިފެންވަރަކަށް ގެންގޮސްދެވޭނެ ކަމަކަށް،" ރައީސް ވިދާޅުވިއެވެ.

މި އިމާރާތުގެ ބޭނުމަކީ ރާއްޖޭގެ ދަރިވަރުންގެ އިތުރުން ބޭރު ގައުމުތަކުން ވެސް ރާއްޖެއަށް އައިސް ދިރާސާތައް ކުރުމުގެ ފުރުސަތު ފަހިކޮށްދިނުން ކަމަށް ރައީސް ވިދާޅުވިއެވެ. އަދި މި މަޝްރޫއުގެ ފަންނީ މަސައްކަތްތަކާއި އިންވެސްޓްމަންޓްގެ ކަންކަން ކުރިއަށް ގެންދާނީ ސަރުކާރުގެ ބަޖެޓަށް ބުރަނުވާނެ ގޮތަށް، ދެމެހެއްޓެނިވި އުސޫލުން ކަމުގައިވެސް އެމަނިކުފާނު ފާހަގަކުރެއްވިއެވެ.

ރައީސް ޑރ. މުއިއްޒު ވިދާޅުވި ގޮތުގައި، މި މަޝްރޫއުގެ ސަބަބުން އިންޖިނިއަރިން ދާއިރާއިން ކިޔަވަން ބޭނުންވާ ކުދިންނަށް ބޮޑު ހިތްވަރެއް ލިބި، މި ފީލްޑްތަކުގައި ރާއްޖެ ވަރަށް މަތީ ފެންވަރަކަށް ތަރައްގީވާނެއެވެ.

މެސެޖު ނިންމަވާލައްވަމުން ރައީސް ވަނީ ރާއްޖޭގެ ހުރިހާ އިންޖިނޭރުންނަށާއި، މި ދާއިރާއިން ކިޔަވަމުންދާ ދަރިވަރުންނަށް އަދި މީހުން ބިނާކުރުމުގައި މަސައްކަތްކުރާ ހުރިހާ ފަރާތްތަކަށް ދުވަހުގެ ހެޔޮއެދުމާއި ޝުކުރު އަދާކުރައްވާފައެވެ.