1000 ގޯލުގެ އިމަށް ފިޔަވަޅު އަޅަމުންދަނިކޮށް ރޮނާލްޑޯ ހެދި ބޮޑު ގޯހަކުން ސޯޝަލް މީޑިއާގައި ބޮޑު ފާޑުކިޔުމެއް!

ދުނިޔޭގެ ފުޓްބޯޅަ ތާރީހުގައި އެއްވެސް ކުޅުންތެރިއަކަށް ހާސިލުކުރެވިފައިނުވާ 1000 ރަސްމީ ގޯލުގެ ތާރީހީ ރެކޯޑާ ދިމާއަށް އަލް ނަސްރުގެ ތަރި ކްރިސްޓިއާނޯ ރޮނާލްޑޯ ދަތުރުކުރަމުންދަނިކޮށް، ސައުދީ ޕްރޯ ލީގުގައި އަބްހާ ކްލަބާ ދެކޮޅަށް ކުޅުނު މެޗުގައި އޭނާ ދަނޑުމަތީގައި ދިން ޓެކްޓިކަލް އިރުޝާދެއް މުޅިން ނުބައިކޮށް ގޮސް، އިދިކޮޅު ޓީމުން ގޯލެއް ޖެހުމުން ސޯޝަލް މީޑިއާގައި ބޮޑު ފާޑުކިޔުމަކާއި ލަދުވެތިކަމަކާ ކުރިމަތިލާންޖެހިއްޖެ އެވެ.

މެޗުގެ 75 ވަނަ މިނެޓުގައި އަބްހާ ކްލަބަށް ލިބުނު ހިލޭ ޖެހުމެއްގެ ވަގުތުގައި، އަލް ނަސްރުގެ ދެ ކުޅުންތެރިން ތިބި "ވޯލް" އިން އެއް ކުޅުންތެރިއަކު ނެރެ އޭރިއާ ތެރެއަށް ފޮނުވާލުމަށް ރޮނާލްޑޯ އަތުން އިޝާރާތްކޮށް އެންގި އެވެ. އެއާއެކު، އަލް ނަސްރުގެ ވޯލްގައި އެކަނިވި ކުޅުންތެރިޔާގެ ކައިރިން އުފެދުނު ބޮޑު ހުސްޖާގައިގެ ފައިދާ ނަގައި، ފަރަންސޭސި ވިލާތާއެކު ވޯލްޑް ކަޕް ކާމިޔާބުކުރި އަބްހާގެ މިޑްފީލްޑަރު ނަބީލް ފެކީރު ވަނީ ސީދާ ގޯލުގެ ތެރެއަށް ބޯޅަ އަމާޒުކޮށްލައިފަ އެވެ.

މި ގޯލުގެ ރީޕްލޭ ސޯޝަލް މީޑިއާގައި އާންމުވެގެން ދިޔައިރު، ގިނަ ބަޔަކު ވަނީ ރޮނާލްޑޯއަށް ހެދުނު މި ޓެކްޓިކަލް ގޯސް ފާހަގަކޮށްފަ އެވެ. ފުޓްބޯޅަ އެނެލިސްޓުކުރާ ފަރާތްތަކުން ވަނީ ރޮނާލްޑޯގެ މި ނިންމުމަށް ވަރަށް ބޮޑަށް ފާޑުކިޔާފަ އެވެ. ފުޓްބޯޅަ ތަހުލީލުކުރާ ފަރާތްތަކުން ބުނެފައިވަނީ "ރޮނާލްޑޯއަކީ ފުޓްބޯޅައިގެ އެންމެ ބޮޑު އެއް ލެޖެންޑަށް ވީނަމަވެސް، ޑިފެންސިވް ވޯލްތަކުން ކުޅުންތެރިން މަދުކުރުމަށް އޭނާ ދިން އިރުޝާދަކީ ކޯޗިންގ ގޮތުން ހެދި މޮޔަ ގޯހެއް" ކަމަށެވެ.

މެޗަށްފަހު އައި ބަހުސްތަކާ ގުޅިގެން ކުޅިވަރު މީޑިއާތަކުން ސިފަކޮށްފައިވަނީ، 1000 ގޯލުގެ އަމާޒަށް އަވަސްވެގަންނަން އުޅުމުގެ ތެރޭގައި ރޮނާލްޑޯއަށް ދަނޑުމަތީގެ ކަންކަމުގައި އޮތް ސަމާލުކަން ކުޑަވެ، މުޅި ޓީމު ނުރައްކަލުގެ ތެރެއަށް ވައްޓާލެވުނު ކަމަށެވެ. ނަސީބަކުން، އަލް ނަސްރުން ވަނީ 2-1 އިން މެޗު ކާމިޔާބުކޮށް ތިން ޕޮއިންޓް ހޯދާފަ އެވެ. ނަމަވެސް، ތާރީހީ 1000 ގޯލުގެ ހޯދުމުގެ ދަތުރުގައި ރޮނާލްޑޯ ހެދި މި ލަދުވެތި ގޯހުގެ ސަބަބުން، ކުރިއަށް އޮތް މެޗުތަކުގައި އޭނާގެ ކެޕްޓަންކަމާއި ޓެކްޓިކަލް ނިންމުންތަކަށް އޮތް ޕްރެޝަރު މިވަނީ އިތުރަށް ބޮޑުވެފަ އެވެ.

މި މެޗުގެ ފުރަތަމަ ހާފުގައި އަލް ނަސްރަށް ފުރަތަމަ ގޯލު ޖަހައިދިނީވެސް ރޮނާލްޑޯ އެވެ. އުމުރުން 41 އަހަރުގެ ކުޅުންތެރިޔާ މެޗުގެ 22 ވަނަ މިނެޓުގައި މި ގޯލު ކާމިޔާބުކުރީ ކޯނަރަކުން ތަނަވަސްވި ބޯޅައެއް ބޮލުން ގޯލުގެ ތެރެއަށް ފޮނުވާލައިގެންނެވެ. މިއީ ޕޯޗުގަލްގެ ތަރި ކާމިޔާބުކުރި 979 ވަނަ ގޯލެވެ. ޖޯޖީނާ ރޮޑްރިގޭޒްއާ ކައިވެނިކުރުމުގެ ކުރިން ދިން އިންޓަވިއުއެއްގައި ރޮނާލްޑޯ ވަނީ އިޝާރާތްކޮށްފައިވާ ގޮތުން، މި ހިނގާ ސީޒަނަކީ އޭނާގެ ޕްރޮފެޝަނަލް ފުޓްބޯޅަ ކެރިއަރުގެ ފަހު ސީޒަނަށް ވުން އެކަށީގެންވެ އެވެ. ސައުދީ ޕްރޯ ލީގުގެ ތާވަލުގެ ކުރީގައި އަލް-ހިލާލް އަދި އަލް-ޤާދިސިއްޔާއާ އެކު 15 ޕޮއިންޓާއެކު އެއްވަރުވެގެން އޮތީ އަލް ނަސްރެވެ.