ޑިއުޓީގައި އުޅެނިކޮށް ފުލުހަކު މަރުވެއްޖެނަމަ، އާއިލާއަށް ބޭސްފަރުވާކޮށްދޭން ޖެހޭ ގޮތް ހަދައިފި

ވާޖިބު އަދާކުރަމުން ދަނިކޮށް މަރުވާ ފުލުހުންގެ އާއިލާއަށް ވެސް ފުލުހުންގެ ހިދުމަތުން ބޭސްފަރުވާކޮށްދޭން ޖެހޭ ގޮތަށް ފުލުހުންގެ ވަޒީފާގެ ގަވައިދު އިސްލާހުކޮށް، ގެޒެޓުކޮށްފިއެވެ.

ފުލުހުންގެ ވަޒީފާގެ ގަވައިދަށް ގެނައި އިސްލާހުގެ ތެރެއިން އެއް އިސްލާހަކީ ފުލުހުންގެ އާއިލާތަކަށް ބޭސްފަރުވާކޮށްދޭ އުސޫލުން ވާޖިބު އަދާކުރަމުން ދަނިކޮށް މަރުވާ ފުލުހުންގެ އާއިލާއަށް ވެސް، ފުލުހުންގެ ހިދުމަތުން ބޭސްފަރުވާ ކޮށްދޭން ޖެހޭނެ ކަމެވެ.

ވާޖިބު އަދާކުރަމުންދަނިކޮށް ނިޔާވާ ފުލުހުންގެ ޖަނާޒާ ވަކި ރަސްމިއްޔާތެއްގެ ގޮތުގައި ބޭއްވުމަށް ނިންމިދާނެ ކަމަށް ވެސް އެ ގަވައިދަށް ގެނައި އިސްލާހުގައިވެއެވެ. އެގޮތަށް ނިންމަންވާނީ ފުލުހުންގެ އޮފިސަރު ނިޔާވި ހާލަތާއި ދިމާވި ހާދިސާގައި ކަން ހިނގި ގޮތާއި މުވައްޒަފު އަދާކުރި ދައުރަށް ބަލައި އެގްޒެކެޓިވް މެނޭޖްމަންޓު ބޯޑަށް ހުށަހަޅައި އެ ބޯޑުން ނިންމާ ގޮތުގެ މަތިން ކަމަށް އެ އިސްލާހުގައިވެއެވެ.

އޮޑިޓް އޮފީހުން ވަނީ، ދައުލަތުން ބޭސްފަރުވާއަށް ކުރާ ހަރަދު ދެމެހެއްޓެނިވި މިންވަރެއްގައި ހިފެހެއްޓުމަށް ސިފައިންނާއި ފުލުހުންނާއި އެ ފަރާތްތަކުގެ އާއިލާތަކަށް މިހާރު ދެމުން އަންނަ ބޭސްފަރުވާގެ ސްކީމް މުރާޖައާކުރަން ލަފާދީފައެވެ. އަދި ދައުލަތުން އެ ފަރާތްތަކުގެ ބޭސްފަރުވާ ކުރަންޖެހޭ ހަރަދު ކޮންޓްރޯލް ކުރެވޭނެހެން ސިޔާސަތުތައް އެކުލަވައިލުމަށް ވަނީ އެދިފައެވެ.