މަގު ކޮންނަ ފަރާތުގެ އިހުމާލުން ކަރަންޓު ކޭބަލަކަށް ގެއްލުންވެއްޖެނަމަ ހަރަދު ހޯދަނީ

މަގު ކޮނުމުގެ އެކި މަސައްކަތުގެ ތެރެއިން ކަރަންޓު ކޭބަލަކަށް ގެއްލުންވެއްޖެނަމަ، އެ މީހަކު ޒިންމާދާރު ކުރުވައި އެ ކަން ހައްލުކުރުމަށް ހަރަދު ނެގުމަށް ސްޓެލްކޯއިން ނިންމައިފިއެވެ.

ސްޓެލްކޯ އިން މި ގޮތަށް ނިންމީ މަގު ކޮނުމުގެ ތެރޭގައި އެ ކުންފުނީގެ ކަރަންޓު ކޭބަލްތަކަށް ގެއްލުންވެ އެކަމުގެ ސަބަބުން ކަރަންޓުގެ ހިދުމަތް ކެނޑި އާންމުންނަށް ދަތިތަކާ ކުރިމަތިވަމުންދާތީ އެވެ.

މިގޮތުން، އެ ކުންފުނިން މިއަދު ބުނީ، މަގު ކޮނުމުގެ އެކި މަސައްކަތްތަކުގެ ތެރެއިން ކަރަންޓު ވިއުގައިގައި ހިމެނޭ ކޭބަލްތަކަށް ގެއްލުންވެގެން ކަރަންޓުގެ ހިދުމަތް މެދުކެނޑި، ރައްޔިތުންނަށް އެތަކެއް ތަކުލީފުތަކަކާއި ދަތިތަކަކާ ކުރިމަތިވަމުންދާ ކަމަށެވެ.

ސްޓެލްކޯ އިން ބުނީ މި ނިންމުމަކީ ކަރަންޓުގެ ހިދުމަތް މެދުކެނޑުމުގެ ސަބަބުން އާންމު ރައްޔިތުންނަށް ދިމާވާ ދަތި އުނދަގޫތަކުން ސަލާމަތްކޮށް، ހިދުމަތުގެ ފެންވަރު ދެމެހެއްޓެނިވި ގޮތެއްގައި ފޯރުކޮށްދިނުމުގެ މަގުސަދުގައި ނިންމާފައިވާ ނިންމުމެކެވެ.

މަގު ކޮނުމުގެ މަސައްކަތް ކުރުމުގައި ސްޓެލްކޯގެ ކަރަންޓު ވިއުގައަށް ގެއްލުން ނުވާނެހެން ޒިންމާދާރުކަމާއެކު މަސައްކަތްތައް ކުރުމަށްވެސް އެ ކުންފުނިން ވަނ އިލްތިމާސްކޮށްފަ އެވެ.