28 ތެލިސީމިއާ ކުދިން ބޯންމެރޯ ހެދުމަށް ރާއްޖެއިން ބޭރަށް ފޮނުވައިފި

ސަރުކާރުގެ އެހީތެރިކަމާއެކު މިހާތަނަށް 28 ތެލެސީމިއާ ކުދިން ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވިފައިވާ ކަމަށް ހެލްތު މިނިސްޓަރު ގީލާ އަލީ ވިދާޅުވެއްޖެ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ، ތެލެސީމިއާ ކުދިންނަށް ދާއިމީ ޝިފާއެއް ހޯދައިދިނުމަށްޓަކައި ޒަކާތު ފަންޑުން އެހީތެރިކަން ފޯރުކޮށްދިނުމާ ގުޅޭގޮތުން އިސްލާމިކް މިނިސްޓްރީއާއި ހެލްތު މިނިސްޓްރީއާ ދެމެދު ސޮއިކުރި އެއްބަސްވުމުގެ ދަށުން ކޮންމެ އަހަރަކު ވަކި އަދަދެއްގެ ކުދިންނަށް ބޯންމެރޯ ޓްރާންސްޕްލާންޓް ހެދުމަށް މާލީ އެހީތެރިކަން ދިނުމަށް ހަމަޖެހިފައިވާ ކަމަށެވެ.

އެ އެއްބަސްވުމުގެ ދަށުން، ކޮންމެ އަހަރަކު 10 ކުއްޖަކަށް، ބޮލަކަށް އެއް މިލިއަން ރުފިޔާއަށް ވުރެ އިތުރުނުވާނެ ގޮތުގެ މަތީން ޖުމްލަ 10 މިލިއަން ރުފިޔާ ހަރަދުކުރުމަށް ހަމަޖެހިފައިވާ ކަމަށް ގީލާ ވިދާޅުވި އެވެ.

އެ އިންތިޒާމުގެ ތެރެއިން މިހާތަނަށް 28 ކުއްޖަކު ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވި، ފަރުވާގެ ކަންކަން ކުރިއަށްދާކަމަށް ގީލާ ވިދާޅުވި އެވެ.

އޭގެ އިތުރުން ތެލެސީމިއާ ބަލި ތަހައްމަލުކުރަމުންދާ ކުދިންނަށް ދައުލަތުން ދެމުން އަންނަ މާލީ އިނާޔަތް މަހަކު 2،000 ރުފިޔާއަށް ބޮޑުކޮށްފައިވާ ކަމަށާއި، މިހާރު 500 އަށް ވުރެ ގިނަ ކުދިންނަށް އެ އެލަވަންސް ލިބެމުންދާކަން ވެސް ގީލާ ފާހަގަކުރެއްވި އެވެ.