ރަސްމާލޭގައި ހިންގާ "މޯލްޑިވްސް ވޯޓާ ފްރަންޓް އެންޑް މެރީނާ" މަޝްރޫއިން ދައުލަތަށް އަހަރަކު 1.1 ބިލިއަން ޑޮލަރު (16.9 ބިލިއަން ރުފިޔާ) ގެ އާމްދަނީއެއް ލިބޭނެ ކަމަށް ފިނޭންސް މިނިސްޓަރު ހަސަން ޒަރީރު ވިދާޅުވެއްޖެ އެވެ.
އީގަލްސް ހިލްސް ކުންފުނިން ހިންގާ މި މަޝްރޫއާ ގުޅޭ ގޮތުން ޒަރީރު ރޭ އެކްސްގައި ވިދާޅުވީ ވޯޓަ ފްރަންޓް މަޝްރޫއު ތަރައްގީ ކުރުމަށް 10 އަހަރުގެ މުއްދަތެއް ނަގާނެ ކަމަށާއި އެ މުއްދަތުގެ ތެރޭގައި ދައުލަތަށް ގާތްގަނޑަކަށް 11 ބިލިއަން ޑޮލަރު (169.9 ބިލިއަން ރުފިޔާ) ލިބޭނެ ކަމަށެވެ. އެއީ ގާތްގަނޑަކަށް އަހަރަކު 1.1 ބިލިއަން ޑޮލަރު ކަމަށް ޒަރީރު ވިދާޅުވި އެވެ.
ރާއްޖެ އަށް މިވަގުތު އެންމެ ބޮޑު އާމްދަނީއެއް ވަންނަ ހަމައެކަނި ދާއިރާއަކީ ޓޫރިޒަމް އިންޑަސްޓްރީ އެވެ. ޒަރީރު ވިދާޅުވި ގޮތުގައި 179 ރިސޯޓާއި 16 ހޮޓަލާއި 920 ގެސްޓް ހައުސް އަދި 165 ސަފާރީ ވެސަލް އެއްކޮށްލައިގެން ދައުލަތަށް އަހަރަކު ލިބޭނެ އާމްދަނީ އަށް ވުރެ ބޮޑު އާމްދަނީއެއް ރަސްމާލެ މަޝްރޫއިން އެކަނި ލިބޭނެ އެވެ.
ރަސްމާލެ އެއްބަސްވުމުގެ ދަށުން ކަނޑައެޅިފައިވާ ރޭޓުތަކުން ލިބޭ ޓީޖީއެސްޓީގެ އިތުރުން ތަންތަން ފުރަތަމަ ފަހަރަށް ވިއްކައިގެންނާއި ކުއްޔަށް ދީގެން ޑިވެލޮޕަރަށް ލިބޭ އާމްދަނީގެ 10 ޕަސެންޓް ދައުލަތަށް ލިބޭނެ ކަމަށް ޒަރީރު ވިދާޅުވި އެވެ. އަދި ފުރަތަމަ ފަހަރަށް ތަންތަން ގަންނަ ފަރާތްތަކުގެ އަތުން ތަންތަން އެ ތަނެއްގެ އަގުގެ ހަތަރު ޕަސެންޓް ދައުލަތަށް ދައްކަންޖެހޭނެ ކަމަށް ވެސް ވިދާޅުވި އެވެ.
ޒަރީރު ވިދާޅުވި ގޮތުގައި މި އެއްބަސްވުމުގެ ދަށުން އެއްވެސް ޓެކްސްއެއް އިނާޔަތެއް އަދި ޑިއުޓީ މާފު ކުރުން ހިމަނާފައި ނުވާ ކަމަށާއި މި މަޝްރޫއަށް ސަރުކާރުން އެއްވެސް ލޯނެއް ނުނަގާ އިރު ސޮވަރިން ގެރެންޓީއެއް ވެސް ނުދޭނެ ކަމަށެވެ.
ރަސްމާލެ އެއްބަސްވުމުގައި ރާވާފައި ވަނީ 500 ހެކްޓަރުގެ ސަރަހައްދެއްގައި، ގާތްގަނޑަކަށް 10 އަހަރުގެ މުއްދަތަށް ބަހާލައިގެން 20 ބިލިއަން އެމެރިކާ ޑޮލަރުގެ ވޯޓަފްރަންޓް އެންޑް މެރީނާ ތަރައްގީ ކުރާ ގޮތަށެވެ.
ޒަރީރު ވިދާޅުވި ގޮތުގައި އެ މަޝްރޫއުގެ ތެރޭގައި ގެތަކާއި ހޮޓާތަކާއި ރިސޯޓުތަކާއި މެރީނާއަކާއި ބޮޑެތި ފިހާރަތަކުގެ އިތުރުން އޮފީސްތަކާއި ހޮސްޕިޓަލްތައް ފަދަ ވަސީލަތްތައް ވެސް ހިމެނޭނެ އެވެ.
ކުރިޔަށް އޮތް 10 އަހަރުގެ ތެރޭގައި މަޝްރޫއު ފުރިހަމަ އަށް ނިމިގެން ދާއިރު އަހަރަކު މިލިއަނަކަށް ވުރެ ގިނަ ޓޫރިސްޓުން ރަސްމާލެ އަށް ޒިޔާރާތް ކުރާނެ ކަމަށް ލަފާ ކުރެވޭ ކަމަށާއި އެހެންކަމުން އެ ދާއިރާ އިން ވެސް އަހަރަކު ދެ ބިލިއަން ޑޮލަރު ދައުލަތަށް ލިބޭނެ ކަމަށް ބެލެވޭ ކަމަށް މިނިސްޓަރު ވިދާޅުވި އެވެ.
