ކުޅުދުއްފުށީ ހޮސްޕިޓަލާއި އައްޑޫ ހޮސްޕިޓަލް އައިޖީއެމްއެޗް ފެންވަރަށް ތަރައްޤީ ކުރަނީ

މުހައްމަދު އިސްމާއިލް

ކުޅުދުއްފުށީ ރީޖަނަލް ހޮސްޕިޓަލާއި އައްޑޫ ސިޓީގެ ހިތަދޫ ރީޖަނަލް ހޮސްޕިޓަލް އިންދިރާ ގާންދީ މެމޯރިއަލް ހޮސްޕިޓަލާއި އެއް ފެންވަރަކަށް ތަރައްޤީ ކުރުމަށް ވަޒީރުންގެ މަޖިލީހުން މިއަދު ނިންމައިފި އެވެ.

މިއަދު އޮތް ވަޒީރުންގެ މަޖިލީހުގެ ޖަލްސާގައި މިގޮތަށް ނިންމެވީ، ރާއްޖޭގެ ޞިއްޙީ ދާއިރާއަށް މިހާރު ކުރިމަތިވެފައިވާ މައްސަލަތަކާ ގުޅޭގޮތުން މަޝްވަރާ ކުރުމަށްފަހު އެޅެން ހުރި ފިޔަވަޅުތަކާ ބެހޭގޮތުން ވަޒީރުންގެ މަޖިލީހުގައި މަޝްވަރާކުރެއްވުމަށް ފަހުގައި ކަމަށް ރައީސް އޮފީހުން މައުލޫމާތު ދެއެވެ.

މީގެ އިތުރުން މިއަދުގެ ޖަލްސާގައި ޞިއްޙީ ދާއިރާގައި ހުރި މައްސަލަތައް ދެނެގަނެ، އެކަންކަން މިހާރަށްވުރެ ރަނގަޅު ކުރުމަށްޓަކައި އަޅާނެ ފިޔަވަޅުތަކާ ގުޅޭގޮތުން ގޮތްތަކެއް ހުށަހެޅުމަށް ވަޒީރުން ހިމެނިވަޑައިގަންނަވާ ސްޓިއަރިންގ ކޮމިޓީއެއްވެސް އެކުލަވާލި އެވެ.

ކުޅުދުއްފުށީ އޮންލައިން އަށް މައުލޫމާތު ލިބިފައިވާ ގޮތުގައި ކުޅުދުއްފުށީ ރީޖަނަލް ހޮސްޕިޓަލް ތަރައްގީ ކުރުމަށް ހުޅުވާލި ފުރުޞަތުގައި އެމެރިކާ އަދި ޔޫރަޕުގެ ބައެއް ކުންފުނިތަކުން ވަނީ ޝައުގުވެރިކަން ފާޅުކޮށްފަ އެވެ. އަދި، މިހާރު އެކުންފުނިތަކުން ހުށަހަޅާފައިވާ ޑޮކިޔުމެންޓްތައް ދިރާސާ ކުރަމުންދާކަމަށް މައުލޫމާތު ލިބެއެވެ.