ހުން އައިސްގެން ޑޮކްޓަރަށް ދައްކާ ފަރާތްތަކުގެ އަތުން ފީ ނުނަގާގޮތަށް ހޮސްޕިޓަލްއިން ހަމަޖައްސައިފި

މުހައްމަދު އާދަމް

މިހާރު ރާއްޖޭގައި ފެތުރިގެން އުޅޭ ވައިރަލް ފީވާގެ ސަބަބުން ހުން އައިސްގެން ޑޮކްޓަރަށް ދައްކާ ފަރާތްތަކަށް ހިލޭ ޑޮކްޓަރަށް ދެއްކޭގޮތަށް ކުޅުދުއްފުށީ ރީޖަނަލް ހޮސްޕިޓަލް އިން ހަމަޖައްސައިފިއެވެ.

މިކަމާއި ގުޅޭގޮތުން އަޕަރ ނޯތު ހެލްތު ސަރވިސަސް ކޯޕަރޭޝަނުން ނެރެފައިވާ އިއުލާނުގައި ވާގޮތުން، މިދުވަސްވަރު ޑެންގޫހުމުގެ ރޯގާއެއް ފެތުރިގެން އުޅޭތީ 6 ޖުލައި 2011 އިން ފެށިގެން މިރޯގާ ކޮންޓްރޯލް ވަންދެން ކޯޕަރޭޝަންގެ ދަށުން ހިނގަމުން އަންނަ ކުޅުދުއްފުށީ ރީޖަނަލް ހޮސްޕިޓަލާއި ދިއްދޫ ހޮސްޕިޓަލް އަދި ފުނަދޫ ހޮސްޕިޓަލަށް ހުންއައިސްގެން ޑޮކްޓަރަށް ދައްކަވާ ފަރާތްތަކުން، ޑޮކްޓަރަށް ދެއްކުމަށް ނަގާ ފީ (25 ރުފިޔާ) ނުނަގާނެއެވެ.

ހޮސްޕިޓަލްއިން މައުލޫމާތު ދޭގޮތުގައި ހުން އައިސްގެން ޑޮކްޓަރަށް ދެއްކުމަށް އަންނަ ފަރާތްތަކަށް ހާއްސަ އޯޕީޑީއެއް މިހާރު ހުޅުވިފައިވާ ކަމަށެވެ. އަދި އެމަޖެންސީ އޭރިޔާގައި އިތުރު އެނދު ބަހައްޓާފައި ވާނެކަމަށްވެސް މައުލޫމާދު ލިބެއެވެ.

މާޗް މަހުން ފެށިގެން އިއްޔެއާއި ހަމައަށް ކުޅުދުއްފުށިން މިހާތަނަށް ޑެންގީ ހުމުގެ 28 ބަލިމީހުން ފެނިފައިވާކަމަށް ކުޅުދުއްފުށީ ޕަބްލިކް ހެލްތު ޔުނިޓުން މުޙައްމަދު އަބްދުއްރަހްމާން މައުލޫމާތު ދެއްވިއެވެ.