ހދ އަތޮޅު ކައުންސިލުގެ ރައީސް އާއި ނައިބު ރައީސްގެ މައްޗަށް އިތުބާރުނެތްކަމުގެ މައްސަލައެއް ހުށަހަޅަނީ

އިބްރާހިމް ހަމީދު

ހދ. އަތޮޅު ކައުންސިލުގެ ރައީސް އާއި އެކައުންސިލުގެ ނައިބު ރައީސް މަގާމުން ވަކި ކުރުމަށްޓަކައި އެދެބޭފުޅުންގެ މައްޗަށް އިތުބާރު ނެތްކަމުގެ މައްސަލައެއް ހުށަހަޅަން އުޅޭ ކަމުގެ ހަބަރު ލިބިއްޖެ އެވެ.

ކުޅުދުއްފުށީ އޮންލައިނުން ކުރެއްވި ސުވާލަކަށް ޖަވާބު ދެއްވަމުން ހދ އަތޮޅު ކައުންސިލުގައި ހިމެނިވަޑައިގަންނަވާ ހދ ހަނިމާދޫ ދާއިރާގެ ކައުންސިލަރ މުސްޠަފާ ސަލީމް ވިދާޅުވި ގޮތުގައި ހދ އަތޮޅު ކައުންސިލުގެ ރައީސް އަދި އެމްޑީޕީގެ މެމްބަރު އާދަމް ވަހީދު އާއި އަމިއްލަގޮތުން ވާދަކޮށްގެން ހޮވިވަޑައިގެންނެވި އަދި އެކައުންސިލުގެ ނައިބު ރައީސް އަހްމަދު ހަލީލުގެ މައްޗަށް އިތުބާރުނެތްކަމުގެ މައްސަލައެއް މާދަމާގެ ޖަލްސާއަށް ހުށަހަޅާކަމަށް ދެކެވޭ ވާހަކައަކީ ހަގީގަތެއް ކަމަށެވެ.

ކުއްލި ގޮތަކަށް ހދ އަތޮޅު ކައުންސިލުގެ ރައީސް އާއި ނައިބު ރައީސް މަގާމުން ވަކި ކުރަން އުޅޭ ސަބަބެއްކަމަށް މުސްޠަފާ ވިދާޅުވީ، ލޯކަލް ގަވަރމެންޓް އޮތޯރިޓީ (އެލްޖީއޭ) އަށް އެންމެ އުތުރުގެ ތިން އަތޮޅުން މެމްބަރަކު ހޮވުމަށް ހަތަރުވަނަ ފަހަރަށް ބޭއްވި ވޯޓުލުމުގައި ދިމާވި މައްސަލައަކާއި ގުޅިގެން ކަމަށެވެ. އެހެންނަމަވެސް އެއީ ސީދާ ކޮން މައްސަލައެއް ކަމެއް މުސްޠަފާ ވިދާޅެއް ނުވެއެވެ.  ހދ އަތޮޅު ކައުންސިލުގެ މާދަމާގެ ޖަލްސާއަށްފަހު އެ ކައުންސިލުގެ އާ ރައީސަކާއި ނައިބު ރައީސެއް ފެނިގެންދާނެކަމަށް އުއްމީދު ކުރައްވާ ކަމަށްވެސް މުސްޠަފާ ވިދާޅުވި އެވެ.

ކުޅުދުއްފުށި އޮންލައިނުން ހދ އަތޮޅު ކައުންސިލްގެ ރައީސް އާދަމް ވަހީދު އަށް ގުޅާލުމުން ވިދާޅުވީ މާދަމާ ހެނދު އަތޮޅު ކައުންސިލުގެ ޖަލްސާއެއް އޮންނާނެ ކަމަށެވެ. އަދި މީޑިޔާއަށް އެޖަލްސާއަށް ވަނުމުގެ ފުރުޞަތު އޮތްކަމަށް ވިދާޅުވި އެވެ. އެހެންނަމަވެސް މާދަމާގެ ޖަލްސާގައި ރައީސާއި ނައިބު ރައީސްގެ މައްޗަށް އިތުބާރު ނެތްކަމުގެ މައްސަލައެއް ހުށަހެޅުމާމެދު ވަކި އެއްޗެއް ވިދާޅެއް ނުވެއެވެ.

ހދ އަތޮޅު ކައުންސިލަކީ ވެރިކަންކުރާ އެމްޑީޕީގެ މެޖޯރިޓީ އޮންނަ ކައުންސިލެކެވެ. އެކައުންސިލުގައި އެމްޑީޕީގެ 07 ކައުންސިލަރުން ތިއްބަވާއިރު ޑީއާރުޕީގެ 2 ކައުންސިލަރުންނާއި ވަކިޕާޓީއަކަށް ނިސްބަތްނުވާ 01 ކައުންސިލަރަކު ހިމެނިވަޑައިގަންނަވައެވެ.