ކުޅުދުއްފުށީ އަމީގޯކެފޭއިން ބޭއްވި ލަކީޑްރޯ ޕްރޮމޯޝަންގެ ގުރުއަތުލުން ބާއްވައިފި

އިބްރާހިމް ހަމީދު

ކުޅުދުއްފުށީ އަމީގޯކެފޭއިން ހިދުމަތް ލިބިގަންނަ ފަރާތްތަކުގެ މެދުގައި މެއިމަހުގެ 29 އިން ޖުލައިމަހުގެ 29 އަށް ބޭއްވުނު ލަކީޑްރޯ ޕްރޮމޯޝަންގެ ގުރުއަތުލުން މިރޭ އަމީގޯކެފޭގައި ބާއްވައިފިއެވެ.

ކުޅުދުއްފުށީ އޮންލައިނަށް މައުލޫމަތު ދެއްވަމުން އަމީގޯކެފޭ ހިންގެވުމާއި ހަވާލުވެހުންނެވި މުހައްމަދު އަލީ ވިދާޅުވީ މިއީ ކުޅުދުއްފުށީގައި ކެފޭއަކުން  ބޭއްވި ފުރަތަމަ މިފަދަ އަގުބޮޑު ލަކީޑްރޯކަމަށާއި އަބަދުވެސް ބޭނުންވަނީ އެކެފޭއިން ހިދުމަތް ލިބިގަންނަ ކަސްޓަމަރުންގެ ހިތްހަމަޖެހުންކަމުގައެވެ.

މިލަކީޑްރޯގައި އެއްވަނަ އިނާމަކަށް އެލްސީޑީ 32 އިންޗީގެ ޓީވީއަކާއި 05 މީހުންގެ އެއްފަހަރުގެ ކެއުމާއި އަދި 06 މަސްދުވަހުގެ އަމީގޯ ކެފޭގެ ޑިސްކައުންޓް ކާޑެއް ހުށަހަޅިފައި ވެއެވެ. ދެވަނަ އިނާމަކަށް ފަނިގިރާ މިކްސްޗަރަކާއި 05 މީހުންގެ ކެއުމާއި 06 މަސްދުވަހުގެ ޑިސްކައުންޓް ކާޑެއް ލިބެއެވެ. އަދި ތިންވަނަ އިނާމެއްގެ ގޮތުގައި ހަމަޖެއްސީ ކުޅުދުއްފުށީގައި ކޭބަލް ހިދުމަތް ދެމުންގެންދާ ފަރާތެއްކަމަށް ކޭބަލް ޗޮއިސްގެ އެއް އަހަރު ދުވަހުގެ ކޭބަލް މަހުފީއާއި 05 މީހުން ގެ ކެއުމާއި 06 މަސްދުވަހުގެ ޑިސްކައުންޓް ކާޑެކެވެ. އޭގެ އިތުރުން ދިހަ އިނާމެއްވަނީ ހަމަޖައްސާފައިކަމަށާއި އެދިހަ އިނާމް ލިބޭފަރާތް ތަކަށް 06  މަސްދުވަހަށް އަމީގޯކެފޭގެ ޑިސްކައުންޓް ކާޑް ލިބޭނެކަމަށް އަމީގޯއިން މައުލޫމަތު ދެއެވެ.

މިރޭ ބޭއްވި ގުރުއަތުލުމުން އެއްވަނަ ފަރާތަކަށް ހޮވުނީ އަހްމަދު މާކިން، އަޒުމްއެވެ. ދެވަނަ ފަރާތަކަށް ހޮވުނީ އަބްދުﷲ އަހްމަދު ދޭދަރުއާގެއެވެ. ތިންވަނަ ފަރާތަކަށް ހޮވުނީ އަބްދުﷲ މުހައްމަދު ޕްލާޒާއެވެ. އަދި މީގެ އިތުރުން އަނެއް ދިހަފަރާތްވެސް ވަނީ ގުރުއަތުން ހޮވާފައެވެ އެދިހަ ފަރާތަކީވެސް ކުޅުދުއްފުށީގެ ދިހަފަރާތެވެ.

ގުރުއަތުލުމުގެ ރަސްމިއްޔާތުގައި ގުރުއަތުތައް ނެގީ އަމީގޯކެފޭއަށް ވަރަށް ގިނަދުވަސްތަކެއް ވަންދެން ހިދުމަތް ކޮށްދެއްވާފައިވާ ކުޅުދުއްފުށީ ނޫވިލު އާސިފް އާއި ކޮރަލްޓީމްގެ މުހައްމަދު ދާއޫދާއި އަމީގޯގެ ވެރިޔާ މުހައްމަދު އަލީގެ އިތުރުން އަމީގޯ ކެފޭއިން އަބަދުވެސް ހިދުމަތް ހޯދަމުން އަންނަ މުހައްމަދު އަހުމަދު، ފުރުންމާގެއެވެ.