މެޑިކަލް ޗެކަޕް ޕެކޭޖްތަކެއް ކުޅުދުއްފުށީ ރީޖަނަލް ހޮސްޕިޓަލުން ތަޢާރަފްކޮށްފި

މުހައްމަދު އާދަމް

ކުޅުދުއްފުށީ ރީޖަނަލް ހޮސްޕިޓަލްއިން މެޑިކަލް ޗެކަޕް ޕެކޭޖްތަކެއް ތައާރަފްކޮށްފިއެވެ.

އަޕަރ ނޯތު ހެލްތް ސަރވިސަސް ކޯޕަރޭޝަން ލިމިޓެޑްގެ ދަށުން ހިނގަމުން އަންނަ ރީޖަނަލް ހޮސްޕިޓަލް އިން ވަނީ 7 މެޑިކަލް ޗެކަޕް ޕެކޭޖެއް ތައާރަފްކޮށްފައެވެ. އޭގެ ތެރޭގައި ހައްޖު އުމްރާ މެޑިކަލް ޗެކަޕް، ހައިޕާ ޓެންޝަން އެންޑް ޑައިބެޓިކް މެޑިކަލް ޗެކަޕް، މެޑިކަލް ޗެކަޕް ފޮރ ވޯކް ޕާމިޓް، މެޑިކަލް ޗެކަޕް ފޮރ ފުޑް ހެންޑްލަރސް، ޖެނެރަލް މެޑިކަލް ޗެކަޕް، ސީ މޭން މެޑިކަލް ޗެކަޕް، އަދި މާސްޓަރ ހެލްތް ޗެކަޕްގެ އިތުރުން ކިޔަވާކުދިންނަށް ހާއްސަކޮށްގެން ތައާރަފްކުރި ސްޓޫޑެންޓްސް މެޑިކަލް ޗެކަޕް ހިމެނެއެވެ.

މީގެތެރެއިން މިދުވަސް ވަރަށް ހާއްސަކޮށް ތައާރަފް ކޮށްފައިވާ ހައްޖު އުމްރާ މެޑިކަލް ޗެކަޕްއަށް ރަނގަޅު ތަރުހީބެއް ލިބެމުން ދާކަމަށް ރީޖަނަލް ހޮސްޕިޓަލްއިން މައުލޫމާތު ދެއެވެ. އަދި ކުޅުދުއްފުށީގައި މަސައްކަތްކުރާ އަދި މަސައްކަތް ކުރަން އަންނަ ބިދޭސީންނަށް މެޑިކަލް ޗެކަޕް ހެއްދުމައްޓަކައި މެޑިކަލް ޗެކަޕް ފޮރ ވޯކްޕާމިޓް ޕެކޭޖަށްވެސް ތަރުހީބު ލިބޭނެކަމަށް ބެލެވެއެވެ.