ކުޅުދުއްފުށީ ކައުންސިލުގެ ލޯގޯ ފަރުމާކުރުމުގެ ފުރުޞަތު އާއްމުކޮށް ހުޅުވާލައިފި

ކުޅުދުއްފުށީ ކައުންސިލުގެ ރަސްމީ ނިޝާން (ލޯގޯ) ފަރުމާކުރުމުގެ ފުރުޞަތު އާންމުންނަށް ހުޅުވާލައިފި އެވެ.

ކުޅުދުއްފުށީ ކައުންސިލުން ބުނީ އެކައުންސިލުގެ ލޯގޯ ފަރުމާކުރުމުގެ ފުރުޞަތު އާއްމުކޮށް ހުޅުވާލާފައިވާއިރު ކައުންސިލަށް ހުށަހަޅާ ލޯގޯތަކުގެ ތެރެއިން އެކައުންސިލުން ބޭނުން ކުރުމަށް ކަނޑައަޅައި ލޯގޯ ހުށަހެޅި ފަރާތަށް 5000 ރުފިޔާގެ ފައިސާގެ އިނާމެއް ދޭގޮތަށް ހަމަޖެހިފައިވާ ކަމަށެވެ.

ލޯގޯ ފަރުމާކޮށް ހުށަހަޅާއިރު ކުޅުދުއްފުށި ކައުންސިލުން ބަލާނެ ކަންތައްތަކެއް ކަމަށް އެކައުންސިލުން މިއަދު ނެރުނު އިއުލާނުގައި ވަނީ، ދިވެހި ދައުލަތާއި ކުޅުދުއްފުށީ ކައުންސިލުގެ މަސައްކަތްތައް ރަމްޒުކޮށްދޭ ލޯގޯ އަކަށް ވާން ޖެހޭނެ ކަމަށެވެ. އަދި، އެލޯގޯއިން ކުޅުދުއްފުށީގެ ޘަގާފަތް ރަމްޒުކޮށްދޭ ލޯގޯއަކަށް ވާންޖެހޭނެ ކަމަށްވެސް ބުނެފައި ވެއެވެ.

ލޯގޯ ފަރުމާކޮށް ހުށަހެޅުމުގެ ސުންގަޑިއަކީ އަންނަ އޮކްޓޯބަރ މަހުގެ 13 ވާ ބުރާސްފަތި ދުވަހުގެ 3 ޖެހުމުގެ ނިޔަލަށް ކަމަށް ކައުންސިލުން މައުލޫމާތު ދެއެވެ.