ކާޑުގެ ބާވަތްތަކުގެ އަގު ކަނޑައެޅުން ކައުންސިލްތަކަށް!

ކާޑުގެ ބާވަތްތަކުގެ ކޮންޓްރޯލް އަގު ރަށު ކައުންސިލްތަކާއި ސިޓީ ކައުންސިލްތަކުން ކަނޑައަޅާގޮތަށް އިކޮނޮމިކް ޑިވެލޮޕްމެންޓް މިނިސްޓްރީ އިން ހަމަޖައްސައިފި އެވެ.

އެ މިނިސްޓްރީ އިން މިއަދު ކޮށްފައިވާ އިއުލާނެއްގައި ބުނެފައި ވަނީ ކާޑުގެ ބާވަތްތަކުގެ ތެރޭގައި ހިމެނޭ އާދައިގެ ހަނޑުލާއި އާދައިގެ ގޮދަން ފުށް އަދި ހަކުރުގެ ކޮންޓްރޯލް އަގު ކަނޑައަޅާނީ ކައުންސިލް ތަކުން ކަމަށެވެ. އަދި އަގު ކަނޑައެޅުމަށްފަހު ކައުންސިލްތަކުން އިއުލާން ކުރަންވާނީ އެ މިނިސްޓްރީ އަށް ހުށަހަޅައި އެ އަގަކީ އެރަށެއްގައި ކާޑުގެ އަގު ވިއްކުމުގެ ކޮންޓްރޯލް އަގު ކަމުގައި އެ މިނިސްޓްރީން ހަމަޖެއްސުމުން ކަމަށެވެ.

ބުދަ ދުވަހު އިކޮނޮމިކް މިނިސްޓްރީން ކޮށްފައިވާ އިއުލާނުގައި ބުނެފައިވާގޮތުން ރަށްރަށުގައި ވިއްކާ ކާޑުގެ ބާވަތްތަކުގެ އެންމެ މަތީ އަގު ކަނޑައަޅާނީ އެރަށެއްގެ ކައުންސިލުންނެވެ. އަދި ސިޓީ ކައުންސިލުން އެކައުންސިލެއްގެ ދާއިރާގައި ހިމެނޭ ރަށްރަށުގައި ކާޑުގެ ބާވަތްތައް ވިއްކޭނެ އެންމެ މަތީ އަގު ކަނޑައަޅާނީ ސިޓީ ކައުންސިލް ތަކުން ކަމަށެވެ.

ކާޑުގެ ބާވަތްތަކުގެ ކޮންޓްރޯލް އަގު ކައުންސިލްތަކުން ކަނޑައަޅާގޮތަށް ހަމަޖައްސާ އިކޮނޮމިކް މިނިސްޓްރީން ކޮށްފައިވާ އިއުލާގައި ބުނެފައިވަނީ ކާޑުގެ ބާވަތްތަކުގެ ކޮންޓްރޯލް އަގު ކައުންސިލްތަކުން ކަނޑައެޅުމަށް ނިންމާފައި ވަނީ، ރާއްޖޭގެ ތަފާތު ސަރަހައްދު ތަކުގައި ކާޑުގެ ބާވަތްތައް ވިއްކުމުގެ ކޮންޓްރޯލް އަގު ކަނޑައެޅުމުގައި އެ ތަކެތި މާލެއިން އެ އަތޮޅަކަށް ގެންދިޔުމަށް ހިނގާ ހަރަދާ ބެހޭ މައުލޫމާތު އެ އަތޮޅެއްގެ އަތޮޅު ކައުންސިލުން ހޯދައި އެ ޚަރަދު ހިމަނައިގެން އަގު ކަނޑައެޅުމުން، ބައެއް ރަށްރަށުން ކާޑުގެ ބާވަތްތައް ވިއްކުން ހުއްޓާލާފައިވާތީ ކަމަށެވެ. އަދި އެރަށަކުން ކާޑުގެ ބާވަތްތައް ގެއްލުންނުވެ ވިއްކޭނެ އެންމެ ކުޑައަގެއް ކަނޑައަޅަން ފަސޭހަވާނީ، އެރަށެއްގެ ރަށު ކައުންސިލުން އެކަން ކުރުމުންކަމަށް އިއުލާނުގައި ބުނެފައި ވެއެވެ.