ސިއްޙީ ނިޒާމުގެ ހާލަތު ދެނެގަތުމަށްޓަކައި ހިންގާ ސިލްސިލާ މަސައްކަތު ބައްދަލުވުންތަކުގެ ތެރެއިން އެއް ބައްދަލުވުން ކުޅުދުއްފުށީގައި

ހާޝިމް އަބޫބަކުރު

ޑަބްލިއު އެޗް އޯގެ އެހީތެރިކަމާއިއެކު މިނިސްޓްރީ އޮފް ހެލްތް އެންޑް ފެމިލީއިން އިންތިޒާމުކޮށްގެން ދިވެހިރާއްޖޭގެ ސިއްޙީ ނިޒާމުގެ ހާލަތު ދެނެގަތުމުގެގޮތުން މަތިއުތުރު ސަރަޙައްދަށް އަމާޒުކޮށްގެން ސެޕްޓެމްބަރ 24 ން 26 އަށް ހިންގާ މަސައްކަތު ބައްދަލުވުން ކުޅުދުއްފުށީގައި ފެށިގެން ކުރިއަށް އެބަދެއެވެ.

ޑަބްލިއު އެޗް އޯ އާއި ހެލްތް މިނިސްޓްރީގެ ބޭފުޅުން ބައިވެލައްވާ މި މަސައްކަތު ބައްދަލުވުމާއި ބެހޭގޮތުން ކުޅުދުއްފުށީ އޮންލައިންއަށް މައުލޫމާތު ދެއްވަމުން މިނިސްޓްރީ އޮފް ހެލްތް އެންޑް ފެމިލީގެ ސީނިއަރ ޕަބްލިކް ހެލްތް ޕްރޮގްރާމް އޮފިސަރ އަލްފާޟިލް ޢަބްދުލްޙަމީދު ވިދާޅުވިގޮތުގައި މި މަސައްކަތު ބައްދަލުވުމުގެ މައިގަނޑު މަޤްސަދަކީ ދިވެހިރާއްޖޭގެ ސިއްޙީ ޚިދުމަތް ދިނުމުގެ ނިޒާމު ހަރުދަނާކުރުމުގެ ގޮތުން މިސަރަޙައްދުގެ ސިއްހީ ޚިދުމަތްތައް މިހާރު އޮތް ގޮތް ދިރާސާކޮށް، ސިއްހީ ޚިދުމަތް ދިނުމުގެ ނިޒާމަށް ކުރިމަތިވެފައިވާ ގޮންޖެހުންތަކަކީ ކޮބައިތޯ ބަލައި، މި ނިޒާމު ހަރުދަނާކުރުމަށްޓަކައި ސްޓްރެޓެޖީސްތަކެއް އެކުލަވާލުމެވެ. އަދި ސިއްހީ ނިޒާމު ހަރުދަނާ ކުރުމަށް ބޭނުންވާ މާލީ އެހީތެރިކަން ހޯދުމުގެ ގޮތުން ގްލޯބަލް ފަންޑިންގ އަށް މިއަހަރުގެ ޑިސެމްބަރ މަހުގެ ކުރިން ރާއްޖޭގެ ފަރާތުން ހުށަހަޅަން ޖެހޭ ޕްރޮޕޯސަލް ތައްޔާރުކުރުމަށްޓަކައި ރާއްޖޭގެ އެކި ސަރަހައްދުތަކުން މައުލޫމާތު ހޯދުމަކީވެސް މި ބައްދަލުވުމުގެ މައިގަނޑު އެއް މަގުސަދުކަމުގައި ހަމީދު ވިދާޅުވިއެވެ.

މީގެ އިތުރުން އެޗް.އައި.ވީ އިން ރައްކާތެރިވުމަށް ކުރިއަށް އޮތް 5 އަހަރަށް ބޭނުންކުރާނެ ނޭޝަނަލް ސްޓްރެޓެޖިކް ޕްލޭން ތައްޔާރުކުރުމަށް މައުލޫމާތު ހޯދުމުގެ ސެޝަނެއްވެސް މި މަސައްކަތު ބައްދަލުވުމުގައި ކުރިއަށް ގެންދާގޮތަށް ވަނީ ހަމަޖެހިފައެވެ.

ހދ. އޭއީސީގެ ރިސޯސް ސެންޓަރގައި ކުރިއަށްދާ މި މަސައްކަތު ބައްދަލުވުމުގައި މިސަރަޙައްދުގެ އެކި ރަށްރަށުގެ ޖަމްއިއްޔާތަކުގެ އިތުރުން ޕަބްލިކް ހެލްތް ސާވިސަސް އާއި ކައުންސިލްތަކާއި އަދި ހެލްތް ކޯޕަރޭޝަންގެ ފަރާތުން ބައިވެރިވާއިރު، މީގެ އިތުރު ދެ ބައްދަލުވުމެއް ލ. އަތޮޅު ހިމެނޭ ސަރަޙައްދާއި އައްޑޫގައިވެސް ވަނީ ކުރިއަށް ގެންގޮސްފައެވެ.