ކުޅުދުއްފުށީ ޕޯޓް ލިމިޓެޑްގެ ޑިރެކްޓަރުންގެ ބޯޑު ރައީސް އަލުން އެކުލަވާލައްވައިފި

ކުޅުދުއްފުށީ ޕޯޓް ލިމިޓެޑުގެ ޝެއަރ ސްޓްރަކްޗަރަށް އައި ބަދަލާ ގުޅިގެން، އެ ކުންފުނީގެ ޑިރެކްޓަރުންގެ ބޯޑު، ރައީސުލްޖުމްހޫރިއްޔާ އަލުން އެކުލަވައިލައްވައިފިއެވެ.

ރައީސް އޮފީހުން މައުލޫމާތުދޭ ގޮތުގައި ކުޅުދުއްފުށީ ޕޯޓް ލިމިޓެޑްގެ ބޯޑު އަލުން އެކުލަވާލިއިރު އެބޯޑުގެ ޗެއަރމަނަކަށް ހަމަޖައްސަވާފައިވަނީ، މާފަންނު އެމަތީސްޓް ޙުސައިން ނަޢީމެވެ. މެނެޖިންގ ޑިރެކްޓަރަކަށް ހަމަޖައްސަވާފައިވަނީ، ކުޅުދުއްފުށީ މާވިނަ އަޙްމަދު ޢާޠިފެވެ.

މިދެބޭފުޅުންގެ އިތުރުން އެކުންފުނީގެ ބޯޑުގައި، މޯލްޑިވްސް ޕޯޓްސް ލިމިޓެޑުގެ ފަރާތުން ތިއްބަވާ އަނެއް ދެބޭފުޅުންނަކީ، މާފަންނު ވެރާ މުޙަންމަދު ހާޝިމާއި، ހެންވޭރު ސެންޓާލަމް އަޙްމަދު ނާޒިމެވެ. ދިވެހި ސަރުކާރުގެ ފަރާތުން މި ބޯޑުގައި ހިމެނިވަޑައިގަންނަވަނީ، ނ. ވެލިދޫ އެއްގަމުގޭ މުޚްތާރު ޙަސަނާއި، ހއ. ހޯރަފުށި ދަނބުރުއްދޮށުގޭ ޝަމްޢޫން ސަޢީދާއި، ތިލަދުންމަތީ ދެކުނުބުރީ ކުޅުދުއްފުށީ ނިޢުމަތް، ޢަބްދުއްރަޙީމް ޢަލީއެވެ.

މިއަހަރުގެ ޖުލައިމަހުގެ ތެރޭގައި މޯލްޑިވްސް ޕޯޓްސް ލިމިޓެޑުން ވަނީ ކުޅުދުއްފުށީ ޕޯޓްސް ލިމިޓެޑްގެ 51 ޕަސެންޓް ހިއްސާ ގަނެފައެވެ.