ޔޫތު ޗެލެންޖް 2011 ކުޅުދުއްފުށީގައި ފެށިގެން ކުރިއަށް އެބަދޭ

އިބްރާހީމް ހަމީދު

ޒުވާނުންނަށް އަމާޒުކޮށްގެން ކޮންމެ އަހަރަކު ބާއްވަމުން އަންނަ ޔޫތު ޗެލެންޖް 2011 ކުޅުދުއްފުށީގައި ފެށިގެން ކުރިއަށް އެބަދެއެވެ.

ޓޫރިޒަމަށް ހާއްސަކޮށްފައިވާ “ފަނާރު” އާއި ޒުވާނުން ވަޒީފާ އަށް އަހުލުވެރިކުރުމަށް ހާއްސަކޮށްފައިވާ “ކިއްސަރު” ފެއަރ ވެސް ކުރިއަށްދާ މިފެއަރ ހުޅުވުމުގެ ރަސްމިއްޔާތު އޮތީ މިއަދު ހަވީރު ކުޅުދުއްފުށީ ޖަލާލުއްދީން ސްކޫލުގައެވެ.

ޔޫތު ޗެލެންޖް ފެށުމުގެ ރަސްމިއްޔާތު ޝަރަފުވެރިކޮށްދެއްވީ ކިއްސަރު ވަޑާމުގައި ވަރަށް ގިނަދުވަހު މަސައްކަތްކުރެއްވި ކުޅުދުއްފުށީ ތަރިޖެހިގެ ޢަލީ މުޙައްމަދު އެވެ.

ކުރިން ސަރުކާރުން ބާއްވަމުން އައި މިފެއަރ ބާއްވާގޮތަށް ބަދަލުގެނެސް ފެއަރ ބޭއްވުމުގެ ކަންތައްތައް ހަވާލުކޮށްފައިވަނީ އަމިއްލަ ފަރާތަކާއެވެ. އެގޮތުން މިއަހަރުގެ ފެއަރ އިންތިޒާމުކޮށް ކުރިއަށްގެންދަން ހަވާލުކޮށްފައިވަނީ ޑެއިޖް ޕްރައިވެޓް ލިމިޓެޑް އާއިއެވެ. އެކުންފުނީގެ ފަރާތުން މައުލޫމާތު ދެމުން ޝިނާޒު ވިދާޅުވީ މިއީ ޔޫތް ޗެލެންޖް، ކިއްސަރު އަދި ފަނާރު ފެއަރ ވެސް އަތޮޅުތެރޭގެ ރަށެއްގައި ބޭއްވޭ ފުރަތަމަ ފަހަރު ކަމަށެވެ. މިފެއަރ ގައި ވަޒީފާގެ ފުރުޞަތުތަކާއި ކިޔެވުމުގެ ފުރުޞަތުތަކާއި ބެހޭގޮތުން މައުލޫމާތު ދިނުން ކުރިއަށްދާނެ ކަމަށް އެފަރާތުން މައުލޫމާތު ދެއެވެ.

ފެއަރ ހުޅުވުމަށް މިއަދު ހަވީރު ޖަލާލުއްދީން ސްކޫލުގައި ބޭއްވި މިރަސްމިއްޔާތުގައި، ސަރުކާރުން ހިންގާ ހުނަރު ޕްރޮގުރާމްގެ މެނޭޖަރު މުހައްމަދު ހާޝިމް ވިދާޅުވީ މިއަދުގެ ޝަރަފުވެރި މެހެމާން އަލީ މުހައްމަދު ފަދަ ބޭފުޅުން މިހާރު ރާއްޖޭގައި މަދުވަމުން އަންނަ ކަމަށާއި އެފަދަ ހުނަރުވެރިންގެ ފަރާތުން ތަޖްރިބާ ލިބިގަނެ އެބޭފުޅުންގެ ކިބައިން ޒުވާނުން ކަންކަން ދަސްކޮށް އުނގެނެން ޖެހޭކަމަށެވެ. އަދި އެފަދަ ހުނަރުވެރިންގެ އަގު ވަޒަންކުރަންޖެހޭނެ ކަމަށްވެސް ވިދާޅުވި އެވެ.

މިފެއަރގައި ހިއުމަން ރައިޓްސް ކޮމިޝަނުގެ އިތުރުން މޯލްޑިވްސް ޕޮލިޓެކްނިކް ފަރާތުން ބައިވެރިވާއިރު ކުޅުދުއްފުށީގައި ހުރި މުއައްސަސާތަކުންވެސް މިފެއަރގައި ބައިވެރިވެފައި ވެއެވެ. މިފެއަރ ކުރިއަށްދާނީ މިއަދުން ފެށިގެން ދެދުވަހުގެ މުއްދަތަށެވެ.

ޔޫތު ޗެލެންޖަކީ ޔޫތް މިނިސްޓްރީން އިސްނަގައިގެން 1999 ވަނަ އަހަރުން ފެށިގެން މާލޭގައި ބާއްވަމުން އަންނަ ހަރަކާތެކެވެ. ތައުލީމީ ދާއިރާގައި ޒުވާނުންނަށް ހުރި ފުރުސަތު ތަކަށް ހާއްސަކޮށްގެން ފެށި ޔޫތު ޗެލެންޖް ފުޅާވެގެން ގޮސް މިހާރު ޔޫތު ޗެލެންޖް ބޭއްވެނީ ޔޫތު މިނިސްޓްރީގެ ކިއްސަރު ޕްރޮގްރާމާއި، ޓޫރިޒަމް މިނިސްޓްރީގެ ފަނާރު ޕްރޮގްރާމްގެ އިތުރުން އެޑިއުކޭޝަން މިނިސްޓްރީގެ ހުނަރު ޕްރޮގްރާމްވެސް ހިމެނޭގޮތަށެވެ.

ޔޫތު ޗެލެންޖް ފެށުމުގެ ރަސްމިއްޔާތު