ކުޅުދުއްފުށީގައި ދުއްވާ ޓެކްސީއެއްގައި އަލިފާން ރޯކޮށްލައިފި

ކުޅުދުއްފުށީގައި ދުއްވާ ޓެކްސީއެއްގައި ރޭ އަލިފާން ރޯކޮށްލައި އަންދާލައިފިއެވެ.

ކުޅުދުއްފުށީ ވެނީލާގޭ އަބްދު ﷲ އާދަމް (އުއްމަނަ އަބްދު ﷲ) ގެ ޓެކްސީ ކާރު ރޭ ރޯކޮށްލާފައިވަނީ ކުޅުދުއްފުށީ ރަތްމުތްގޭ ގަރާޖްގައި އޮށްވައެވެ. މީގެ ކުޑަދުވަސްކޮޅެއް ކުރިން ކާރުގެ ވިންޑް ސްކްރީން ތަޅައިލައިގެން މަރާމާތަށް ގެންގޮސް ރަތްމުތްގޭ ގަރާޖުގައި ބާއްވާފައި އޮށްވާ ރޭ، އެކާރުގައި ރޯވެފައި އޮށްވާ ފެނިފައިވަނީ މެންދަމު ދެއެއް ޖަހާލާ ހާއިރު ކަމަަށް މައުލޫމާތު ލިބިފައި ވެއެވެ.

އަލިފާން ގަނޑު ރޯވެފައި ހުއްޓާ އަބްދު ﷲ އަށް ފެނުމުން ފުލުހުންނާއި އެމްއެންޑީއެފްގެ ފަޔަރ ޓީމަށް އެންގުމުން އައިސް އަލިފާން ގަނޑު ނިއްވާލިކަމުގައި ވިޔަސް، އޭރު ކާރު ވަނީ ބޭނުންނުކުރެވޭ ވަރަށް އަނދާ ހުލިވެފައެވެ.

މިހާދިސާއާއި ގުޅޭ ގޮތުން ފުލުހުންގެ މީޑިއަރ އޮފިޝަލް އަހުމަދު ޝިޔާމް ވިދާޅުވީ، މިކަމާއި ގުޅިގެން އަދި މިހާތަނަށް އެއްވެސް މީހަކު ހައްޔަރު ކޮށްފައި ނުވާކަމަށާއި، ފުލުސް އޮފީހުން ދަނީ މިމައްސަލަ ތަހުގީގު ކުރަމުން ކަމަށެވެ.